Fundus sai hanesan obstaklu bo’ot ne’ebe uma mahon sira hasoru durante ne’e hodi fo asistensia ba vitima Violensia Domestika (VD) no Violensia Bazeia ba Jeneru ne’ebe akontese iha rai laran, tanba ne’e organizasaun Rede Feto hanesan mahon ba feto Timor husu governu foun atu bele suporta servisu ne’ebe Uma Mahon sira hodi fo asistensia ba vitima sira.
“Hau hanoin presiza estabelese uma mahon iha distritus hotu, la’os distritu balun deit tanba violensia domestika akontese iha teritorio tomak no kontinua fo apoiu fundus ba operasional nune’e pesoal sira ne’ebe hala’o servisu iha uma mahon bele fo asistensia ne’ebe diak liu ba vitima violensia bazeia ba jeneru,” sujere Diretora Ezekutivu Feto Kbi’it Servisu Hamutuk (FKSH) ne’ebe mos nudar membru Rede Feto, Gisela de Carvalho, (06/08), iha nia knar fatin Bairo-Pite, Dili.
Tuir nia, Lei VD ne’ebe governu liu husi Sekretaria EStadu Promosaun Igualidade (SEPI) implementa seidauk la’o ho diak tanba uma mahon ne’ebe iha sseidauk sufsiente.
“Servisu fo atendimentu ba vitima violensia domestika no violensia bazeia ba jeneru ne’e la’os fasil tanba fo asistensia ba vitima nia kazu no nesesidade vitima nian durante iha uma mahon,” Membru Rede Feto ne’e dehan.
Tuir nia katak durante ne’e distritu hirak ne’ebe laiha uma mahon vitima violensia domestika sira sempre relata sira nia kazu ba iha rede referral sira no Unidade Polisia Vuneravel (VPU) hodi fo asistensia ba sira nia kazu.
Iha parte seluk Reprezentante feto iha Parlamentu, Deputada Josefa Alvares Soares katak uma mahon sira ne’ebe agora dadaun fo asistensia ba vitima violensia domestika no bazeia ba jeneru, presiza tulun makas husi estadu, tanba sira presiza rekursu umanus hanesan doutor phsicologia ne’ebe bele fo tratamentu ne’ebe diak ba vitima sira iha tempu trauma.
“Buat Importante ne’ebe uma mahon tenke iha mak tenke iha ema konseleiru atu bele fo konseilu ba vitima sira hodi fiar an involve fali iha sosiedade nia let ne’e durante ne’e iha duni rekursu hanesan madre sira maibe konaba Pisikologia atu bele kontrola situasaun vitima nian hanesan trauma ne’e mak hau hanoin kuran iha uma mahon,” dehan Deputada Soares.
Deputada ne’e konkorda ho movimentu feto rekomenda ba governu atu estabelese tan uma mahon iha teritoriu tomak hodi fo protesaun ba feto no labarik iha teritoriu tomak liu-liu area rurais.
