“Iha semana rua kotuk liu sidadaun Myanmar nain 4, ne’ebe maka atraves mai iha ita nia nasaun, liu husi area weste, entaun Komando Operasaun Distritu Bobonaro detein hela, no prosesu ne’e tama ona iha Tribunal, prosesa tuir lei tanba ema sira ne’e laiha dokumentus, tama ho illegal,” hateten Diretor Servisu Investigasaubn criminal (SIC), Xefe Calisto Gonzaga, (06/08), iah Kaikoli, Dili.
Tuir nia, ema sira ne’e mai iha Timor-Leste, ho intensaun atu husu asiliu politika, tanba iha Myanmar akontese hela krizi politika, no ema barak maka lakon, fahe malu, ne’e duni sira hili mai iha Timor-Leste.
Agora dadaun desizaun sei intrega ba Imigrasaun atu deporta ou sei fo asiliu, ne’e depende imigrasaun.
Enkuantu kazu ne’e rasik halo ona primeiru interogatoriu iha Tribunal Distrital Suai (TDS) e tribunal foti ona desizaun fo 20 dias ba sira atu hela iha Timor.
“Kona ba deporta ou la’e ne’e desizaun husi estadu Timor-Leste,” hateten Ofisias Justisa iha TDS ne’ebe lakohi publika nia naran.
Entretantu Deputadu Francisco Branco, husu ba estadu atu fo tempu temporariu atu bele sira hela iha ne’e, depois maka haruka sira fila ba sira nia rain.
“Uluk Timor-Leste rezeita ona, atu labele simu ema husi nasaun seluk ne’ebe maka iha problema iha sira nia rain, tanba ita nudar nasaun ne’ebe maka ki’ik. Mais hare ba kondisaun hanesan ne’e, uluk Timor mos akontese hanesan ne’e, ne’e duni karik bele fo tempu provizoriamente ba sira atu hela iha ne’e, depois de ne’e maka haruka sira fila,” sujere Deputadu Branco.
Maibe nia sujere karik fo tempu ba sira hodi hela iha TL, tenke halo akordu atu nune’e, sira hela iha Timor tuir tempu ne’ebe maka determina ona.
“Timor labele hafasil dalan tanba kuandu hanesan ne’e, sei fo dalan ne’ebe maka fasil ba sira nia kolega mai tan, ne’e labele,”
