“Polisia seidauk bele hetan informasaun klean, tanba vitima sei hala’o hela tratamentu iha Ospital Nasional Guido Valadares (HNGV). Depois de tratamentu hotu, husi SIC, sei koko hodi koalia ho vitima, maibe prosesu investigasaun kontinua la’o,” hateten Diretor SIC, Superintendente Calisto Gonzaga (13/08) iha Kaikoli, Dili.
Jornalista ne’e hetan sona iha kabun husi ema deskonesidu iha area Farol nian, iha tuku lima madrugada, hafoin fila husi sosa tiket iha Portu.
Iha lidun seluk Sekretariu Estadu Komunikasaun Sosial (SE), Nelio Isaac Sarmento lamenta no triste ho hahalok husi ema deskunesidu ne’ebe maka sona Jornalista ne’e.
“Hau triste no lamenta ho kazu violensia ne’ebe hasoru jurnalista, sa’tan sei kazu ne’e akontese ba jornalista ne’e tanba deit ninia servisu nudar jurnalista, ne’e bele estraga mos prosesu demokrasia,” lamenta Sekretariu Estadu Sarmento.
Tanba ne’e nia husu ba Polisia Investigasaun atu halo investigasaun hodi hetan autor ba kazu ne’e.
SE Sarmento mos husu ba jornalista sira atu hatene katak sira nia profisaun ne’e iha risku, iha ema balun kontenti ho sira nia profisaun, no iha ema balun la kontenti ne’e duni husu ba jornalista sira tenke hatene tau aan tuir situasaun ne’ebe iha.
Entretantu Deputadu Pedro da Costa Martires husu ba polisia atu servisu ho professional hodi bele identifika suspeitu ba kazu ne’e.
“Kuandu situasaun hanesan ne’e bele halo povu la hakmatek, ne’e duni husu ba polisia atu bele hetan lalais suspeitu ne’e hodi hatama nia ba tribunal,” Deputadu ne’e sujere.
