Ho realidade katak iha terseira lejislatura meza Parlamentar domina husi mane no la fo oportunidade ba feto sira atu espresa sira nia kapasidade hodi foti desizaun, Grupu Feto Parlamentar (GMPTL) sei esforsu hodi defende maka’as direitu feto maluk sira iha setor hotu, hodi promove igualidade jeneru.
“Nudar feto ida no reprezentante feto iha Uma Fukun Parlamentu hau tenke valoriza feto maluk sira nia dignidade no maturidade politika nudar feto, feto ida kuandu tur ona iha Parlamentu nia sei la soe feto maluk sira seluk, tanba feto iha kapasidade no responsabilidade ne’ebe bo’ot liu mane maske nia sai membru governu, nia mos iha responsabilidade nudar inan ida ho ida ne’e importante ita tenke luta ba direitu feto ,” hateten Deputada Bendita Moniz Magno, (03/08), iha Parlamentu Nasional.
Nudar Deputada foun, nia sei kolabora ho deputada reeleitu hodi diskute klean liu tan kona ba estrutura GMPTL rasi nune’e bele sai forte liu tan, hodi defende no luta ba direitu feto.
Iha fatin hanesan tuir Eis Prezidente GMPTL, Deputada Josefa Alvares Soares lamenta no triste tanba bloku koligasaun la fo oportunidade ba membru GMPTL sira atu tur iha pozisaun foti desizaun maske sira iha kapasidade.
“Ami lamenta tebes tanba tinan ida ne’e nein feto ida iha pozisaun Prezidensia, iha ona komentariu husi ami nia kolega sira ne’ebe tur iha bloku koligasaun katak iha ona feto ne’ebe lidera hanesan tur iha sekretaria ne’e salah, saida mak ami hakarak ne’e pozisaun desizaun tanba feto mos iha kapasidade iha PN ida ne’e, sekretaria laiha poder foti desizaun ida tun mai deputadus sira maibe atu ajuda iha Administrasaun Parlamentu Nasional,” lamenta Deputada Soares.
Tanba ne’e GMPTL sei mantein nafatin no sai forte liu tan iha futuru tanba iha membru deputada sira ne’ebe tur iha Parlamentu Nasional iha background ne’ebe atu dudu feto maluk sira ba oin.
Durante iha nia mandatu, sira simu keixa barak husi feto maluk sira hanesan abandona, violasaun seksual, abuzu seksual, violasaun direitu humanus no seluk tan no keixa sira ne’e sira rekomenda ba orgaun kompotente atu hare asuntu sira ne’e tanba GMPTL la’os grupo desizivu.
