“Primeiru ami rona problema ne’ebe inan feto sira presiza no kreatividade ne’ebe inan feto sira iha hanesan iha kapasidade suku, soru tais, halo dosi tradisional, aimoruk tradisional no seluk tan, ami identifika kreatividade ne’ebe sira iha ami nia organizasaun pronto supporta sira iha area jestaun (treinamentu) no ami mos iha finanseiru oituan hodi hola material ne’ebe sira presiza (makina suku, tein no seluk),” hateten Diretora FKSH, Gisela de Carvalho, (06/08), iha nia knar fatin Bairo Pite, Dili.
FKSH rasik estabelese iha tinan 2002 kedas, maibe atividade hasa’e kapasidade ba grupu feto ne’e foin hala’o iha distritu tolu ma hanesan Distritu Aileu iha grupu lima, Ermera iha grupu tolu no Distritu Bobonaro, Sub-distritu Maliana iha grupu lima mos.
La’os ne’e deit, FKSH mos iha programa interkambiu hanesan halo vizita hodi hare direitamente ba grupu feto balun ne’ebe susesu, ho intensaun nune’e grupu seluk ne’ebe hare bele sai hanesan inspirasaun no korajen atu sira seluk mos dezenvolve sira nia negosiu hodi hetan rendimentu ne’ebe diak.
“Ami mos promove kreatividade ne’ebe grupu feto sira iha hanesan espozisaun nivel nasional no distrital, e kada fulan neen ami halo monitorizasaun ba benefisiuriu sira iha kada grupu, e fo duni rezultadu pozitivu ba sira e grupu balun loke bo’ot sira nia negosiu,” Diretora ne’e tenik.
Ohin loron hafoin ukun aan iha organizasoens feto barak mak tau atensaun ba feto maluk sira, liu-liu iha area rurais hodi kontribui ba dezenvolvementu nasional.
“Maibe estadu tenke hare mos tanba sira iha fundus ba sosiedade sivil sira hodi promove igualidade jeneru sai diak liu tan no aumenta feto sira nia ekonomia iha uma laran, ida ne’e mak hau hanoin tenke halao,” sujere Deputada Josefa Alvares Soares.
Deputada ne’e mos sujere ba orgaun kompotente foun ne’ebe iha, atu fo formasaun ba feto maluk sira iha area rurais no nafatin halo supervisaun ba proposta feto maluk sira ne’ebe atendidu ona nune’e bele hatene ninia susesu to’o iha ne’ebe se lae orsamentu fahe malu deit nia rezultadu laiha.
