Tuir deklarasaun Lezada AD iha Tribunal Distrital Dili (TDD), katak iha momentu ne’eba lezada tur hela ho nia kolega iha liur derepenti Arguidu bolu maibe Lezada la hatan.
“Nia bolu hau rona hela, maibe hau hatan ba nia, hein oituan lai tanba hau sei koalia hela ho hau nia kolega, hau hatan hanesan ne’e, nia mos nonok tiha,maibe hafoin hau nia kolega fila tiha hau tama uma laran derepenti nia foti sintu ne’e baku hau nia isin sira ne’e to’o bubu hotu, dudu hau monu ba rai, depois nia husik tiha hau no sai ba liur,” deklara Lezada, iha Tribunal Distrital Dili (TDD), (27/07), iha Mandarin, Dili.
Kazu ne’e rasik rejistu iha TDD ho numeru prosesu 97/2011, no akontese iha Lurumata, Aldeia 03, Sub0-distritu Dom Aleixo, Distritu Dili iha 02 Novembru 2010.
Hafoin ne’e Lezada ho nia alin ba kedas iha Polisia hodi kesar Arguidu nia attitude ne’ebe maka halo Violensia Domestika.
Entertantu Arguidu AS katak, iha momentu ne’eba Arguidu nakonu ho emosaun ne’e duni Arguidu halo hahalok hanesan ne’e.
“Hau la rona nia dehan hein lai, ne’e duni halo hau nervozu, tanba hau hanoin nia la konsidera hau nudar nia laen nebe maka nia tenki rona, ne’e duni wainhira nia tama hau baku nia ho sintu no tebe nia,” deklara Arguidu AD.
Iha deklarasaun ne’e Arguidu arepende ho hahalok ne’ebe maka nia halo ba Lezada no promote sei la halo tan hahalok hanesan ne’e.
Julgamentu ne’e diriji husi juis uniku Duarte Tilman, no Reprezentante husi Ministeriu Publiku Prokurador Jose Ximenes no Arguidu hetan defeza husi Advogadu Manuel Exposto.
Hafoin rona tiha declarasaun husi Arguidu ho Lezada, juis hamonu pena suspensaun durante fulan hat ba arguidu, no selu multa ho orsamentu hamutuk $50.
