Tuir Sekretariu Jeral Asosiasaun Advogadu Timor-Leste (AATL), Manuel Tilman katak durante ne’e,Tribunal uza deit Lei Kodigu Prosesu Penal artigu 122 ne’ebe maka koalia kona ba testamunha nia kapasidade no testamunha nia dever jeral deit.
“Tenke iha lei ida ba protesaun ba sasin, juis sira fo korajen ba ema ne’ebe maka hatene evidensia ruma atu bele ba partisipa iha polisia hodi hato’o nia deklarasaun, no husi parte polisia ga Ministeriu Publiku labele hatete sai nia naran ba ema seluk, no labele fo sai ba publiku saida maka nia hatete, no polisia tenke fo seguransa ba nia, nune’e ema mos sente seguru wainhira nia hakarak kesar buat ruma,” sujere SJ AATL Tilman, (26/07), iha Dili.
Tuir nia, Parlamentu Nasional foun tenke hare didiak lei ne’e, hodi buka tempu atu hadia lei ne’e, nune’e bele hafasil prosesu ida, no bele fasilita komunidade sira atu hato’o sira nia evidensia ruma.
Entertantu Advogadu Manuel Exposto dehan, bainhira Testamunha hato’o deklarasaun iha Tribunal, Juis haruka Arguidu hein iha liur nune’e labele rona deklarasaun husi sasin ne’e.
“Hau seidauk lee detailadu kona ba lei ne’e, maibe hau hanoin in prinsipiu iha pratika lor-loron, wainhira lezada hakarak hato’o nia deklarasaun juis autoriza arguidu tenke hein iha liur, nune’e bele evita arguidu halo fali problema ho sasin,” hateten Advogadu Exposto.
Tuir nia, durante ne’e laiha kazu ida hafoin Sasin fo nia deklarasaun iha tribunal, depois hetan ameasa husi Arguidu.
“Karik tanba kazu ki’ik oan sira, maibe in jeral ita presiza duni lei protesaun ba sasin ne’ebe maka masimu, e husu ba asemblei kompotente atu hare kona ba ida ne’e,” tenik Advogadu ne’e.
