Simu ka la simu, aseita ou la’e maibe ida ne’e mak realidade ne’ebe akontese durante ne’e iha sosiedade nia le’et katak valor servisu feto maka’as liu kompara ho mane sira, tanba feto alende servisu iha publiku, nia mos sei tau matan ba familia uma laran.
“Feto halo servisu dupla funsaun, depois nia fila husi servisu fatin fila ba uma nia sei halo servisu uma laran, tein, hare oan sira, fase roupa, hamos uma laran no liur no seluk tan,” hateten Sekretaria Estadu Promosaun Igualidade (SEPI), Idelta Maria Rodrigues, iha Hotel Timor, Dili.
Mane bainhira fila husi servisu fatin, sira laiha ona servisu seluk, tanba sira lahatene oinsa halo servisu uma laran.
“Ita sai ba liur semana ida deit, mane sira sai bulak e sira sempre dehan hau nia servisu ne’e todan para mate, tanba sira la hatene oinsa mak bele atende oan sira, fo osan ba oan sira bainhira atu ba eskola, prepara hahan no seluk tan,” dehan tan SE Rodrigues.
“Mais kuandu sira mak ba rai liur to’o kleur mos, normalmente ita feto halo ita nia funsaun ho diak,”.
Entretantu hanoin hanesan mos mai husi Liaison Officer Fundasaun Alola (FA), Jacinta da Cruz katak feto halo servisu maka’as liu mane, maibe dalabarak mane sira la rekonese feto nia servisu.
“Malahan sira dehan husik ba feto sira servisu to’o mate, e sira la fo valor ba feto nia servisu,” dehan Liaison Officer ne’e.
Enkuantu Joven Angelina Soares, ne’ebe akompanha no observa inan sira iha area rurais liu-liu iha distritu Baucau durante ne’e, katak inan mak halo servisu barak liu.
“Ezemplu hanesan hau nia inan ba servisu to’os, natar e fila husi to’os lori ai sunu, fila mai uma halo tan servisu uma laran hanesan tein, hare animal sira hanesan fo han fahi, manu no seluk tan, pokoknya inan nia servisu sura labele,” hateten Feto foinsa’e husi Distritu Baucau ne’e.
Nia dehan, aman sira nia servisu mak ba halo to’os ka natar, depois fila mai la halo buat ida, tur deit ona iha uma.
