Kazu Joventude Armindo Perreira, estudante husi Universidade Dili ne’ebe mate iha Hera, iha loron 17 Julhu 2012 hafoin konferensia kuadrus partidu Congresu Nasional Rekonstrusaun de Timor (CNRT) nian, agora tama ona iha prosesu investigasaun.
“Agora dadaun prosesu la’o hela no atu oinsa para investiga ema balun atu bele hetan autor, maibe ne’e la’os buat nebe maka fasil, ne’e duni ita presiza tempu ne’ebe maka barak,” dehan Diretor Servisu Investigasaun Criminal, Superintendente Xefe Calisto Gonzaga, iha nia kantor iha Kaikoli, Dili.
Tuir nia, iha momentu ne’e kondisaun iha parte ne’eba komesa manas, tanba ne’e polisia tun hodi hakalma situasaun no ikus mai joven ne’e sai vitima fali ba kondisaun ne’e.
“Kondisaun ne’ebe maka la kontroladu iha Hera, entaun rezulta ita nia joven ida ho inisial AP 20 anos mate, nia husi distritu Viqueque, Sub-distritu Osu nian, nia estudante Universitas Dili, semester tolu nia maka sai vitima ba kondisaun iha neba,” dehan Xefe Gonzaga.
Husi SIC rasik halo ona aprosimasaun ho Ministeriu Publiku (MP) atu koopera hamutuk hodi halo prosesu investigasaun ba kazu ne’e.
Entertantu deputada Maria Maia Reis,husu ba polisia atu aselera prosesu investigasaun, nune’e bele hetan autor ba kazu ne’e.
“Tenke hetan autor ne’e hodi bele responsabiliza hahalok ne’ebe maka nia komete, tanba ne’e ema nia vida,” sujere Deputada Reis.
