Politika Nasional ba Defisiente (PND) ne’ebe kria husi Ministeriu Solidaridade Sosial (MSS) ho sira nia parseiru, sai hanesan baze legal ida ba governu no sosiedade sivil atu fo atensaun masimu ba ema alezadu sira iha teritoriu tomak.
“Ida ne’e importante no tenke ejisti, nune’e lasusar ba governu atu implementa sira nia programa, atividade no tau orsamentu tuir intervensaun ne’ebe refleta ona iha politika ne’e nia laran,” hateten Diretor Nasional Asistensia Sosial, Amandio Amaral Freitas, (03/07), iha nia knar fatin Bemori, Dili.
Diretor ne’e haktuir, iha programa intervensaun sia (9) mak refleta iha PND nia laran, balun implementa ona mak hanesan, asesu defisiente iha setor edukasaun, saúde, iha sosiedade, igualidade jeneru no seluk tan.
Alende programa hirak ne’e, iha mos programa importante ne’ebe presiza implementa mak asesu ema defisiente iha area komunikasaun no transporte, liu-liu sira ne’ebe matan at. “Hanesan sira uza telephone ho braile, no lampu merah tenke tau alarm nune’e maske sira labele hare, maibe sira rona lian entau signifika katak sira bele ultra pasa, mas Timor-Leste seidauk iha ida ne’e,” Diretor ne’e dehan.
Politika ne’e rasik aprova ona iha Konselhu Ministru (KM) no lansa iha dia 05 Julhu 2012, no sei implementa iha tempu badak.
Entretantu Defisiente Abilio de Araujo, sente kontente ho politika ne’e, maibe nia parte duvida ho implementasaun tanba mandatu governu ida ne’e fulan ne’e remata ona.
“Governu foun, politika no programa mos foun. Koalia kona ba fo kontribuisaun ba nasaun ida ne’e,ami defisiente mos bele, liu-liu liu husi area desportu,” dehan Defisiente ne’e.
Nia espera katak, governu foun mai bele implementa politika ida ne’e hodi garante sira nia direitu hanesan mos ho ema normal sira.
