Maioria eskola sira (eskola publiku) iha capital Dili bee tama ba salas laran Binhira tempu udan, tanba eskola hirak ne’e laiha bee dalan ida, ne’ebe halo bee la’o tuir nia dalan.Hanesan Eskola Ensino Sekundaria 04 de Setembru, Balide maske eskola ne’e rehabilita tiha ona maibe bee sempre tama ba sira nia eskola laran, tanba laiha bee dalan (kanu).
“Sala tolu sorin ne’e bainhira udan maka’as ona la aproveita e labarik sira la eskola,” informa Profesor Agostino Oliveira Pinto, (26/06), iha nia knar fatin Balide, Dili.
Tuir Profesor ne’e, ida ne’e fo impaktu bo’ot ba estudante sira atu halo prosesu aprendijazen ho diak, tanba tenke muda sira ba sala seluk.
Entertantu Estudante turma Siensia Sosias Miclanjelo Gonsalves, katak bee tama iha nia sala laran bainhira tempu udan, ne’e fo impaktu ba sira nia prosesu aprendijazen.
“Ami labele tama iha aula ,ami halimar to’o tuku 10:00 fila ba uma,” dehan Estudante Goncalves.
Tanba ne’e, nia parte husu ba Ministeriu Edukasaun (ME), atu tau atensaun ba kestaun ne’e, nune’e bainhira udan labele impede sira nia aprendijazen.
Entretantu Estudante turma 2 Siensia Sosiais Vasco Alves , senti triste tanba problema bee tama sira nia eskola kleur ona, maibeto’o agora seidauk resolve.
“Estadu la tau matan ba iha ami nia eskola, tanba udan bo’ot ka ki’ik bee tama hela deit,” Estudante ne’e kestiona.
Hatan ba kestaun ne’e Diretor Jeral Ministeriu Edukasaun (DJ-ME), Apolinario Magno katak,atu responde ba preokupasaun hirak ne’e, la’os kompetensia Ministerio Edukasaun nian deit maibe Ministeriu Solidariedade Sosial no Obras Publiku mos tenke kontrola.
“Ezemplu hanesan ami nia INFORDEPE ne’e, bainhira udan tun ebe bele nakonu husi ne’eba mais ne’e Ministeriu la halo buat ida,” dehan DJ.Magno.
Iha sorin seluk Sekretariu Jeral Sindikatu Profesores(SJ-SPTL), Francisco da Costa Fernandes hateten, problema ne’e la’os akontese deit ba eskola 04 Setembru, maibe kuaze eskola hotu iha teritoriu tomak.
“Ita hare parte Becora ninian eskola 05 de Maiu, eskola 12 de Novembru, 10 de Dezembru, no eskola Finantil, sira hanesan hotu bainhira udan bee tama iha sala laran,” dehan SJ-SPTL ne’e.
“At liu mak eskola Finantil, Finatil iha moru laran, be ne’ebe mai husi udan ben tun mak nia nakonu iha eskola nia sai fatin la iha,” SJ-SPTL ne’e preokupa.
Impaktu husi ida ne’e, obriga Estudante inklui Profesor sira tenke hasai sapatu bainhira atu tama bas ala laran.
