Ministeriu Justisa (MJ) liu husi Diresaun Nasional Direitus Humanus Sidadania (DNDHS) transforma informasaun ba iha komunidade sira iha rural, liu husi fahe livrus atu sira mos bele asesu ba iha informasaun kona ba justisa nian.
“Hahu iha 2008 liu husi progarama propiu ida ho titlu ‘Lori Justisa ba Povu’, hodi halo desiminasaun liu-liu kona ba lei direitus humanus nian ba iha populasaun sira iha area rurais,” hateten Diretor Nasional Asesoria Juridika e Legislasaun, Nelinho Vital, semana kotuk (08/05) iha Colmera, Dili.
Tuir nia, meius ne’ebe maka Ministeriu uza hodi transforma informasaun ba komunidade sira maka liu husi livrus.
“Fahe livru konaba konstituisaun, kodigu penal, nomos kodigu sivil mos dalaruma ho lei seluk ne’ebe maka relevante, no meius seluk mak halo dialogu komunitariu no intergadu ho komunidade sira, aprezenta material, no aprezenta politika ne’ebe maka ministeriu halo ona,” Diretor Vital afirma.
Tuir nia, meius transforma informasaun ba iha komunidade, sira halo ona iha kuaze Distritu hotu.
Entertantu Membru Komisaun A Parlamentar, Deputadu Natalino dos Santos, dehan povu iha direitu atu asesu ba informasaun kona ba justisa nian, no Ministeriu Justisa iha dever atu fahe informasaun ba sira.
“Justisa ne’e importante ba ema hotu, liu-liu ba komunidade sira ne’ebe maka hela iha area rurais sira, sira tenke hato’o ba komunidade sira kona ba lei ne’ebe maka halo ona, informasaun sobre justisa ne’e tenke fo sosializasaun ba povu, para sira bele iha kunesementu,” dehan Deputadu dos Santos.
Tuir nia, durante ne’e iha komunidade balun maka hatene ona konaba justisa no lei sira nebe maka halo tiaona, maibe iha mos komunidade balun seidauk hatene.
