Planu Governu Aliansa Maioria Parlamentar (AMP) atu hari uma lima ba ema vulneravel iha kada aldea, liu-liu iha Distritu Dili, hela deit promesa no la implementa ona, tanba mandatu governu besik remata ona.
Tuir Xefe Suku Kaikoli, Hipolito Marques katak, husi nia suku prepara tiha ona rai mamuk (iha edifisiu Bombeirus nia kotuk) atu halo uma lima ne’ebe governu promote ba sira.
“Hau la hatene iha distritu balun halo ona ka la’e, hau la hatene mais liu-liu iha Dili, hau hatene katak, Dili tomak seidauk halo liu-liu iha suku Kai-Coli,” preokupa Xefe Suku Kaikoli, Marques, semana kotuk (10/05) iha Kaikoli, Dili.
Xefe Suku ne’e haktuir, nia parte mos rekolha tiha dadus ema vulneravel iha nia suku laran ne’ebe merese atu hetan uma ne’e.
Xefe suku ne’e mos duvida implementasaun ba planu ida ne’e, tanba mandatu governu AMP besik hotu ona. “Povu barak mak husu mai ami kona ba uma lima ne’e, maibe ami labele halo buat ida, e ami hein deit desizaun husi governu,” tenik Xefe Suku Marques.
Entertantu Deputada Josefa Alvares Soares duvida katak, governu sei la implementa programa ne’e, tanba laiha estudu viabilidade ne’ebe governu halo kona ba planu ne’e.
“Tenke halo iha fatin ida, iha bee moos, asesu baa hi, tenke iha fasilidade nune’e ema bele hela iha uma ne’e, maibe governu la halo ida ne’e tanba laiha estudu viabilidade,” Deputada Soares dehan.
Iha fatin hanesan Deputadu Aderito Hugo hateten, ezemplu projetu ba uma lima ne’e komesa la’o dadauk ona hanesan iha Batugade, Maliana, Manatutu no mos iha distritu sira seluk halo ona.
“Ema balun sei kestiona sobre pakote uma ne’e oinsa, e agora halo hela faze ida, faze modelu iha ne’eba para ema hotu hare,” hateten Deputadu Hugo.
Tuir nia, planu ne’e tama iha projetu tinan barak nian (multi years), ezemplu iha 2011 uma lima kada aldeia no uma sanulu kada aldeia iha 2012,” dehan Deputadu Hugo.
Nia hatutan, fator seluk ne’ebe impede implementasaun planu ne’e mak kona ba problema status rai ne’ebe to’o ohin loron seidauk hetan solusaun.
Tanba ne’e mak Governu kontinua iha faze negosiasaun hodi hatudu modelu uma nian ba iha
komunidade sira.
