Distritu rua Ermera no Aileu sei hasoru problema menus rekursu umanus, tanba populasaun sira fo liu importansia ba kustume cultural nian, duke asesu ba iha edukasaun.
“Iha ema barak mak tama iha eskola, maibe to’o iha klaran barak mak abandona eskola tanba inan-aman tau importansia liu mak kustume kulturais, osan ne’e uza ba halo lia deit e ladun fo importansia ba sira nia oan atu hetan edukasaun,” hateten Sekretariu Jeral Sindikatu Profesores Timor-Leste (SPTL), Francisco da Costa Fernandes, semana kotuk (07/05) iha nia knar fatin Farol, Dili.
Tuir nia, iha labarik barak mak abandona sira nia eskola, tanba osan laiha hodi sosa sira nia nesesidade eskola nian.
“Apelu ba inan-aman sira iha Timor laran tomak katak, hahu agora ita tenke fo asistensia aas liu ba oan sira nia future ba eskola, duke tau interese maka’as liu ba setor kulturais ninian,” apela Sekretariu Jeral SPTL Fernandes.
Entertantu Membru Parlamentu Nasional, Deputadu Mateus de Jesus katak, governu loke eskola gratuita e ema hotu iha direitu atu hetan edukasaun, ne’e garante iha Konstituisaun Republika Demokratika Timor-Leste (RDTL) nian.
“Ita hare katak kestaun moral mak ladun to’o husi inan-aman ba oan sira ou tanba nesesidade tuir kultura uluk ninian sira nia oan sira 15 to’o 17 anos tenki forma ona uma kain,” hateten Deputadu de Jesus.
Deputadu ne’e afirma, maske ida ne’e hanesan kestaun privadu, maibe labarik sira presiza future ne’ebe diak no tenke asesu ba iha edukasaun.
Iha sorin seluk membru Komisaun F Parlamentar, Deputadu Francisco de Araujo sujere ba governu, atu halo edukasaun sivika ba iha komunidade sira kona ba importansia edukasaun ba oan sira.
“Ita nia inan-aman iha area rural atende liu mak buat ne’ebe la fo benefisiu ba sira nia future, se ida ne’e mak as liu entaun ema ne’ebe proativu iha sidade, proativu iha edukasaun no oan sira mak be-beik, ita fila-fali ba kotuk,” Deputadu ne’e preokupa.
Tanba ne’e husu ba inan-aman sira iha Timor laran tomak, atu iha konsiensia maka’as hodi redus volume kultural ne’ebe ikus mai la fo buat ida ba oan sira.
