Sindikatu Profesores Timor-Leste (SPTL) lamenta ho attitude Diretor Eskola balun iha Distritu Ermera ne’ebe fo sala lista profesores voluntariu sira nia naran ba iha Ministeriu Edukasaun (ME), tanba naran ne’ebe sai iha Ministeriu, laiha lista.
“Hau iha semana rua liu ba, hau to’o iha ministeriu hau dehan ba sira katak, ita bo’ot sira labele simu deit lista profesores voluntariu ne’ebe mak mai husi distritus ka mai husi regional, tenke verifika los ka la’e ema ne’e voluntariu iha ne’eba, ” lamenta Sekretariu Jeral SPTL. Francisco da Silva Fernandes, semana kotuk (07/05) iha Farol, Dili.
SekJer. SPTL Fernandes mos husu ba ME, atu labele husu direita lista profesores voluntariu ba iha Diretor eskola sira, maibe tenke husu mos ba iha komunidade sira, nune’e bele hetan informasaun ne’ebe justu.
“Ami lakohi diretor da eskola sira, la’os hato’o profesor voluntariu sira nia naran, maibe hato’o fali ema ne’ebe durante ne’e fa’an sasan iha merkadu nia naran mak sai fali iha ministeriu,” dehan SekJer. Fernandes.
Sekretariu Jeral SPTL ne’e mos sujere ba governu, liu husi ME atu tau matan ba profesores voluntariu sira, tanba sira barak mak maske hanorin tinan barak ona maibe to’o ohin loron, seidauk hetan rekonesementu husi governu.
Entertantu Deputadu Mateus de Jesus dehan, profesores voluntariu aumenta tanba volume alunus mos maka’as, maibe dalaruma mos alunus oituan deit, e diretor da eskola mak hakarak hatama nia ema.
“Mais ita hare kusta liu ita rezolve problema hanesan ne’e, e ida ne’e familiarismu la’os partidaria, tanba diretor rasik mak tau nia ema iha ne’eba,” Deputadu de Jesus katak.
Tanba ne’e, nia parte sujere ba iha Diretor eskola sira atu tetu didiak antes bolu ema ruma ba hanorin ho voluntariu, e karik presiza duni profesor voluntariu tenki hato’o pedidu ba iha ME.
Iha fatin hanesan Membru Komisaun F Parlamentar, Deputadu Francisco de Araujo dehan, manipulasaun ne’e mosu, tanba ministeriu la fo instrusaun ba Diretor Rejional no Diretor Nasional sira atu kontrola ba iha eskola Pre-primaria, Pre-secundaria to’o Secundaria sira.
“Hau hanoin ne’e la justu, ema ne’ebe voluntariu tinan hitu ka tinan ualu la hetan kontratu, maibe diretor nia maluk sira ne’ebe fa’an hela sasan ba mai,e voluntariu fulan ida rua deit ,sira nia lista mak iha fali,” Deputadu de Araujo tenik.
Deputadu ne’e hatutan, hafoin halo fiskalizasaun Komisaun F nian iha Distritu Lospalos, identifika katak profesores 400 resin mak hanorin ho voluntariu.
“Numeru ne’e sei aas tebes, kuandu ita kompara ho distritu sira seluk,” Deputadu ne’e katak.
