Importasaun droga iha Timor-Leste mesmu sei ho volume ne’ebe maka ki’ik, maibe atu prevene presiza kontribuisaun husi komunidase sira servisu hamutuk ho polisia, nune’e bele prevene droga tama barak liu.
“Husu ba komunidade hotu-hotu tenke partisipa katak, bainhira nia hatene katak sasan hanesan droga ne’e tama iha ne’e, nia bele komunika ba polisia, wainhira kuandu polisia mesak deit ne’e defisil atu la’o ho susesu,” dehan Segundu Komandante Polisia Nasional Timor-Leste (PNTL), Afonso de Jesus, semana kotuk, (07/05) iha Kaikoli, Dili.
Tuir nia, polisia mos kaptura ona ema drogadu sira, e balun tama ona iha prizaun no balu sei prosesu hela, maibe ida ne’e konsidera sei ki’ik.
“Ami kaer ema balun-balun, halo ona prosesu ba tribunal ona, depois balu tama ona iha kadeia, ne’e iha ona indikasaun katak sasan sira ne’e iha ona ita nia rai laran, mas ninia pakote ou volume ne’e ladun bo’ot” dehan Komisariu de Jesus.
Iha lidun seluk Membru Komisaun B Parlamentar, Deputadu Jose Teixeira husu ba polisia, tenki tau liu atensaun ba iha area fronteira.
“Tenke iha seguransa maka’as, importante liu maka ita nia polisia tenki aplika lei, ita nia lei kona ba anti narkoba ne’e tenki aplika ho diak,” hateten Deutadu Teixeira.
Deputadu ne’e mos sujere ba Polisia, atu cek sasan sira ne’ebe maka tama iha nasaun ida ne’e.
