Kazu vitima mutilasaun MV ne’ebe akontese iha fulan Abril 2012, ate agora Polisia seidauk kaptura suspeitu e prosesu investigasaun kontinua la’o.
“Kazu ne’e ema ida la hare ho matan, ne’e duni susar atu hetan autor ne’e lalais iha tempu badak, tenke han tempu, e polisia sei esforsu maka’as para atu buka autor ne’e, tenta oinsa para bele buka komunikasaun, bele forma oin-oin para bele hetan informasaun husi ema seluk, nune’e ita bele hetan autor ne’e,” hateten Segundu Komandante PolisiaNasional Timor-Leste (PNTL), Komisariu Afonso de Jesus, semana kotuk (07/05) iha Kaikoli, Dili.
Tuir nia, maske kleur maibe prosesu investigasaun kontinua la’o hodi buka tuir autor to’o hetan.
Vitima ho inisial MV ne’e rasik sai husi nia uma iha Pantai Kelapa, iha loron Domingo, 15 Abril 2012 iha tuku 08:00 kalan no hetan fali isin mate iha 20 Abril, iha area Akanunu nian iha Hera, Dili.
Vitima mutilasaun ne’e hetan oho husi ema deskonesidu, ho kondisaun ulun laiha, ain rua no liman rua laiha hotu.
Entertantu Membru Komisaun B Parlamentar, Deputadu Jose Teixeira, husu ba polisia atu halo esforsu hodi buka suspeitu to’o hetan no bele julga tuir lei ne’ebe iha.
“Polisia investigasaun tenke servisu ho Ministeriu Publiku, lei tenke funsiona ho diak,” sujere Deputadu Teixeira.
