Deputadus iha Parlamentu Nasional, Dili, la konkorda kona ba prosessu harii Sentral Eletrika Betano ho deputadu balun hateten konstrusaun parado no seluk hateten la’o daudauk hela.
Deputado Inacio Moreira kestiona makas kona ba prosessu harri Sentral Elektrika Betano no hateten obra ne’e paradu hela no presiza investiga tuir ba osan ne’ebe mak Parlamentu aprova tiha ba iha obra ne’e.
“Sera ke osan ida ne’e mak kaer hela halo fali projetu emerjensia hanesan agora fahe malu hela ne’e karik,” husu Deputadu Moreira, iha Plenaria Parlamentu, Dili, semana kotuk (07/05).
Entertantu Membru Komisaun G Parlamentar, Deputadu Adriano do Nascimento hateten konstrusaun Sentral Eletrika Betano oras ne’e dadauk la’o hela e esperak katak iha 2012 bele finaliza.
“Muda-mudahan sentral eletrika Same nian labele transfere hodi halo ba buat seluk,” Deputadu ne’e esperansa.
Tuir observasaun ne’ebe mak Deputadu do Nascimento halo ba obra ne’e nota katak maske fatin ba konstrusaun ne’e dudu tiha maibe neneik liu no tenke neneik duni.
“Se ita hakarak lalais deit, sai emerjensia hotu deit mak kualidade la iha, ita halo arbiru deit,”deputadu Nasimentu informa.
Iha sorin seluk Prezidenti Komisaun G, Deputadu Pedro da Costa Martires katak konstrusaun Sentral Eletrika Betano oras ne’e la’o hela mesmu ke neneik liu.
“Agora dehan fali fahe ba kompania ida ne’e, ba kompania ida neba, hau senti sira ne’e deskonese, koalia deit, pratika ne’e la iha,” dehan Prezidenti komisaun G, Deputadu Martires.
Tuir nia ekipamentus sira ne’ebe presiza ba obra ne’e oras ne’e dadaun mobiliza hela ba iha fatin ne’eba.
