Impaktu husi udan bo’ot ne’ebe nunka para, obriga Estudante sira husi Eskola barak iha kapital Dili tenke hasai sapatu bainhira atu tama ba eskola laran, tanba bee nalihun iha sira nia eskola.
“Liu-liu eskola Finantil, udan hanesan horiseik no horbainrua ne’e sira tama iha klase laran tenke hasai sapatu, tama tiha eskola laran mak foin hatais fali,” preokupa Deputadu Inacio Moreira, iha Plenaria Parlamentu , semana kotuk (07/05).
Tuir Deputadu Moreira problema hanesan akontese mos iha Eskola 10 Dezembru, maske infra-estrutura eskola nian diak ona tanba rehabilita tiha ona, maibe eskola oin husik bee nalihun deit.
Iha fatin hanesan Membru Komisaun F ne’ebe trata asuntu eduksaun no saude, Deputada Tereza de Carvalho, hateten, ne’e la’os foin primeira ves akontese maibe dala barak ona e komisaun hato’o tiha ona ba iha Ministeriu Edukasaun, maibe laiha rezultadu.
“Durante mandatu Governu AMP tinan lima,ami komesa la’o iha 2009 ami halo fiskalizasaun ami hato’o kestaun ne’e tiha ona maibe agora depende ba iha Ministeriu,” dehan Deputada de Carvalho.
Iha parte seluk Sekretariu Jeral Sindikatu Profesores Timor-Leste (SekJer-SPTL), Francisco da Costa Fernandes hateten, la’os deit eskola rua ne’e mak bee nalihun, maibe kuaze ke eskola hotu iha Dili laran infrenta problema ne’e.
“Ita hare hanesan eskola Becora ninian eskola 5 de Maio, 12 de Novembru, inklui 10de Dezembru, Finantil no mos eskola 4 de Setembru ,” hateten SekJer SPTL Fernandes.
Tuir nia, aat liu mak eskola Finantil , maske governu rehabilita tiha ona, tanba eskola ne’e iha moru laran, no laiha bee dalan para bele la’o tuir nia dalan.
“Alunus sira wainhira sai husi estrada to’o ba iha ne’eba atu tama ba iha eskola sira sempre hasai sapatu inklui profesor no profesora sira tenki hasai sapatu, bainhira atu tama basala laran,” Sekretariu Fernandes kestiona.
Enkuantu iha eskola 10 Dezembru nian bee naliun nanis kedas, tanba ne’e mak husu ba Governu atu ateru rai iha eskola ne’e.
