Esbosu Politika Nasional ba ema Defisiente (PND) ne’ebe prepara husi Ministeriu Solidaridade Sosial (MSS) hein deit implementasaun hafoin Konselhu Ministru (KM) aprova tiha ona (18/04).
“Nudar membru governu, ami sente katak ho esbosu ne’e bele sai hanesan baze legal ou matadalan ida ba ami hodi fo asistensia seriu ida ba maluk defisiente sira ho baze legal,” dehan Sekretario Estado Assistensia Sosical no Dezastres Naturais, Ministerio Solidariedade no Sosial (MSS), Jacinto Rigoberto, semana kotuk (25/04), iha Dili Convention Center.
Tuir SE Rigoberto, antes implementa PND ne’e, MSS ho Sosiedade Sivil sira sei halo sosializasaun ba governu no komunidade hotu, nune’e bele la’o ho susesu no garantia direitu defisiente sira nian.
SE Rigoberto dehan, kontiudu husi esbosu ne’e rasik, koalia liu kona ba planu no misaun, vizaun estadu nian atu tau atensaun maximu hodi garantia direitu defisiente nian.
Tanba tuir nia, bazeia ba sensus uma kain ne’ebe hala’o iha 2004, ema ho kondisaun defisiente hamutuk 1002, iha 2010 hamutuk 48.000 resin.
“Balun hetan difisiente tanba asidente ruma, no balun mos moris mai ho kedas kondisaun difisiente,” tenik SE Rigoberto.
Iha parte seluk Diretor Fundasaun Klibur Domin (FKD), Joaquin Soares, nudar Sosiedade Sivil ne’ebe durante ne’e luta ba direitu ema defisiente, duvida ho implementasaun PND ne’e, tanba mandatu governu AMP besik remata ona.
“Esbosu ne’e hetan ona aprovasaun maibe ita laiha garantia ba governu foun atu implementa, tanba ne’e politika deit komitmentu governu foun nian bele mos la implementa, maibe tau fali iha meja okos tanba ne’e la’os kestaun prioridade ba sira,” Diretor Soares duvida.
Maske nune’e, tuir nia Sosiedade Sivil, sei kontinua supporta no enkoraja governu foun ne’ebe sei mai, atu tau matan nafatin ba asuntu defisiente ho klaru.
