Vise Ministra Saúde (VMS), Madalena Hanjam hateten, prosesu pagamentu rejime karreira ba pesoal saúde hanesan emfermeirus, parteira no doutores sira, sei la halo iha mandatu governu Aliansa Maioria Parlamentar (AMP) nia ukun, bainhira laiha solusaun ne’ebe diak entre pesoal saude sira.
“Hau sente hein deit halo pagamentu tanba osan alokadu ona, maibe sira pesoal saúde ladun koalia ba malu di-diak, balun hakarak halo komplein, hau sente presiza tempu atu resolve, maibe labele ona atu hanaruk tan problema se lakohi simu agora, hein governu foun,” dehan Vice Ministra Hanjam, semana kotuk, (25/04), iha Dili Convention Center (DCC), Merkadu Munisipal, Dili.
Tuir nia, komitmentu Governu AMP atu implementa rejime karreiraba pesoal saude, hanesan faze motivasaun ida ba sira, atu hala’o sira nia servisu nudar professional saúde no hadia sira nia kondisaun moris.
Iha parte seluk Membru Komisaun F Parlamentar, Deputadu Francisco Jeronimo dehan, governu la seriu atu implementa rejime karreiraba pesoal saude sira, tanba laiha preparasaun.
“Nudar membru parlamentu, hau husu ba governu liu husi ministerio saúde atu uza di-diak tempu ne’ebe sei iha, atu resolve komplein ne’ebe mai husi pesoal saúde balun,nune’e bele hala’o ona pagamentu rejime karreiraba pesoal saúde sira ne’ebe iha direitu atu hetan, labele soe hela deit,” dehan Deputado Jeronimo.
Nia hatutan, Parlamentu aprova orsamentu rejime karreiraba pesoal saude ne’e iha 2011, no atu implementa iha 2012, maibe to’o ohin loron seidauk realiza.
“Hau la konkorda kuandu ministeriu lakonsege resolve problema ne’e, no dehan hein fali governu foun, ne’e la los,” Deputadu Jeronimo la konkorda.
