Sekretariu Estadu Formasaun Profesional e Empregu (SEFOPE), Bendito Freitas, husu ba empregador da meja (pelayan resto) no resepsionista sira iha hotel, atu hatudu oin midar (murah senyum-Indo) bainhira atende bainaka sira.
“Hau hare bainhira hau ba iha loza, hau husu ba pelayan sira ne’e ‘lilin nia fatin iha ne’ebe? e sira hatudu ho ibun deit, ne’ebe hau hanoin ida ne’e ladun diak, ita tenke akompanha ema ne’e, no simu sira ho senyum,” hateten SE. Freitas, semana kotuk (27/04) , bainhira partisipa iha serimonia graduasaun ba estajiunario 100 iha area Turismu no Hopitalidade, iha ETDA Fatuhada, Dili.
Tuir SE.Freitas, hatudu oin midar ne’e importante ba empregador da meja, ho nune’e bele atrai vizitantes sira.
“Kuandu bainhira ita ba Bali-Indonezia, iha restorante sira, ita foin mak tur deit, pelayan sira langsung mai ho senyum hodi hasee ita ‘selamat pagi, ka selamat siang pak, mau minum atau makan apa ?’ mais ita nian, ita tur kleur mos, nein ema ida hakat mai, husu hakarak hemu ka han saida, ne’e la’e,” SE. Freitas halo komparasaun.
Tanba ne’e nia parte husu ba graduadu sira atu hatudu oin midar bainhira simu bainaka sira ne’ebe mai vizita iha “imi nia fatin ne’ebe imi servisu ba, no hatudu imi nia komportamentu ne’ebe diak iha imi servisu fatin,” SE. Freitas apela.
Entretantu iha fatin hanesan Internship Program Manager East Timor Development Agency (ETDA), Januario Mok hateten, durante iha formasaun, iha buat tolu mak importante, ida kona ba abilidade, komportamentu no disiplina.
“Iha formasaun laran, buat sira ne’e ami fo hotu, hanesan hamnasa, hatudu oin midar ka senyum, maibe depende ba ema ida-idak nia karakter, mas ba sira ne’ebe servisu iha hotel ka restorante, sira tenke aprende hamnasa, no senyum hela de’it,” dehan Program Manager Mok.
Iha oportunidade hanesan tuir graduadu iha area hospitalidade, Monica Ornai katak, hamnasa no oin midar ne’e importante ba sira, ho nune’e bele atrai vizitantes sira.
“Kuandu ita servi tamu sira ho hamnasa ka senyum, sira mos kontente no bele vizita be-beik ba ita nia restorante ka hotel ne’ebe ita servisu ba, ne’ebe hamnasa ne’e importante mai hau,” dehan Graduadu Ornai.
Graduadu Ornai sente kontente ho formasaun ne’ebe nia hetan husi ETDA, tanba ajuda duni nia atu hetan servisu ho fasil.
“Hau kontente, tanba iha tanggal 2 Maiu agora, hau aranka ona ba Australia, atu servisu iha ne’eba iha area hospitalidade,” Ornai kontente.
