Tuir Membru Komisaun F Parlamentar, Deputada Ilda Maria da Conceicao, katak kareta multifunsaun ospital nian ne’ebe durante ne’e halo operasaun iha distritu, ladun uza tuir nia funsaun ho diak tanba falta de konesementu husi Diretores sira.
“Ami foin halo fiskalizasaun iha distritu Ainaro, ami hetan informasaun katak, kareta multifunsaun la hala’o nia servisu evakua moras liu-liu inan partus sira, maibe diretor mak uza fali ba nia an, hanesan kareta ba diretor hodi desloka mai nasional, ne’e jestaun ida ne’ebe ladiak ministerio tenke hadia,” hateten Deputada da Conceição, semana kotuk (23/04) iha Parlamentu Nasional, Dili.
Deputada ne’e lamenta tanba maske Ministeriu Saude hatene ona problema ne’e, maibe nunka toma atensaun. “Hau hanoin ministeriu tenke fo atensaun, nune’e director sira hatene funsaun kareta multifunsaun,” Deputada ne’e katak.
Iha lidun seluk Vice Ministra Saude, Madalena Hanjam dehan, tuir regulamentu ne’ebe iha atu evakua ema moras emerjensia, kualker kareta id abele, tantu kareta multifunsaun, ambulansia no kualker kareta estadu nian ida.
“Kuandu ministerio saúde nia kareta laiha, bele impresta mos kareta husi Polisia sira nian ou kualker kareta estadu nian ida bele ajuda, tanba iha distritu so ministerio saúde no PNTL mak iha sistema to’o iha baze,” dehan Vice Ministra Hanjam.
