Tuir Primeiru Ministriu (PM) Kay Rala Xanana Gusmaõ, dame no rekosiliasaun ne’e importante ba Timor-Leste no ba mundu tomak.
PM. Gusmao hato’o kestaun relasiona ho nasaun barak mak sei nakonu ho hahalok violensia no funu ne’ebe nunka hotu.
“Ita hare iha TV, iha fatin hotu-hotu iha deit konflito no funu. Hanesan iha Irak, halo tiha funu tinan sanulu, sira estraga malu nafatin. Ne’ebe pas no rekonsiliasaun ne’e buat ne’ebe maka importante tebes,” dehan PM Gusmao, bainhira koalia iha Konferensia kona ba ‘peace no reconsilitation’, iha Dili Convention Center (DCC), semana kotuk (25/04).
Tanba ne’e tuir PM. Gusmao konferensia ne’e importante ba Timor tanba, Timor sai nudar ezemplu ida para nasaun Asia ne’ebe maka tuir konferensia ne’e, bele lori buat diak ida ba sira nia rain.
“Atu sira promove nafatin hanesan toleransia,no dialogu,” PM Gusmao esperansa.
Tuir PM. Gusmao, dalabarak konflitu mosu tanba kondisaun ekonomia ne’ebe ladun estabil.
“Ameasa terorismo, no ameasa oin-oin, se’e laiha pas ita atu ba ne’ebe los.” Dehan PM. Gusmao.
Iha fatin hanesan Vise Primeiru Ministru (VPM) Cambodia H.E. Sok An,ne’ebe partisipa iha konferensia ne’e dehan, povu Timor-Leste hatudu ona sira nia komprimisu bo’ot atu hari pas no estabilidade, liu husi eleisaun prezidensial ne’ebe foin dadauk halo sein violensia.
”Povu Timor-Lesta iha komprimisiu bo’ot atu harii pas, estabilidade no haburas rekonsiliasaun nasional,” gava VPM Cambodia, H.E. Sok An.
Nia sente kontenti tanba bele partisiapa iha eventu ne’e, hamutuk ho Timor atu bele promove liu tan rekonsiliasaun.
“Ohin loron hau iha onra bo’ot no laran haksolok atu tuir serimonia abertura konferensia konzunta kona ba promove rekonsiliasaun, tuir dalan ba pas no prosperioridade iha Dili,” dehan VPM Cambodia ne’e.
