Tuir fiskalizasaun ne’ebe mak Membru Komisaun F Parlamentar halo iha Distritu Ainaro, identifika katak, Professor 300 resin mak sei voluntariu, maske hanorin iha tinan barak nia laran.
“Ita ema la’os lor-loron ba servisu deit, hanesan sira ne’ebe kaben nain sira iha fen no oan atu moris oinsa,” hateten Membru Komisaun F, Deputada Ilda Maria da Conceicao, semana kotuk, (24/04) iha Parlamentu Nasional, Dili.
Tanba ne’e nia parte husu ba Ministeriu Edukasaun (ME) atu hare asuntu ne’e no buka mekanismu oinsa para resolve problema ne’e.
Entertantu Membru Komisaun F seluk, Deputadu Domingos da Costa dehan, problema ne’e la’os akontese deit iha distritu Ainaro, maibe iha teritoriu tomak, liu-liu profesores sira iha area rural barak mak hanorin ho voluntariu.
“Foin dadauk ami mos vizita hotu iha Ermera, iha Kinta semana kotuk iha problema hanesan professor kuaje 300 mak professor voluntariu,” dehan Deputadu Mesquita.
Tuir nia, lolos professores hirak ne’e tama ona iha permanente e ida ne’e akontese tanba mekanismu mak la diak.
Deputadu ne’e hatutan, Professores voluntariu husi tinan ba tinan aumenta ba bebeik, tanba eskola sira iha area rurais menus Professores, entaun husi Diretor da Eskola sira foti inisiativa rasik bolu professor sira hodi hanorin ho voluntariu deit.
“Hau hanoin Ministeriu edukasaun tenki servisu hamutuk ho director da eskola iha teritoriu Timor laran tomak atu bele hapara professor voluntariu sira tanba sen kordenasaun husi Ministeru no eskola,” Deputadu ne’e sujere.
