Tuir Sekretaris Meja Parlamentu Nasional, Deputada Maria Exposto katak, Parlamentu aprova tiha ona lei veteranus nian no oras ne’e dadauk iha ona faze implementasaun.
“Lolos membru Governu ho membru komisaun ba halo desiminasaun informasaun iha baze, para ema bele kompriende,” dehan Sekretaris PN, Deputada Exposto, semana kotuk,(10/04) iiha Uma Fukun, Dili.
Tuir Deputada Exposto, dala barak problema akontese ba iha veteranus sira, no halo reklamasaun tanba ema barak mak ladun kompriende kontiudu husi lei ne’e.
“Tanba la kompriende,lei ne’e atu dehan saida e halo ema barak lakon sira nia direitu,” Deputada Exposto tenik.
Entertantu Deputadu Mario Viegas Carascalao sublina katak, lei ne’e importante tebes atu hare ba veteranus sira nia direitu.
“Veteranus iha fatin ne’ebe deit iha mundu iha direitu, mais tenki prova katak, nia veteran duni, nia merese duni, la’os tanba hotu-hotu tenki sai hotu veteranus,” tenik Deputadu Carascalao.
Deputadu ne’e hatutan, Timor-Leste hetan independensia, la’os ka’er kilat deit maibe povu hotu-hotu nia kontribuisaun.
“Wainhira 30 Agostu ba halo votasaun ba referendum nian ne’e, sira nia votu ne’e mak fo liberdade,” dehan Deputadu ne’e.
Tanba ne’e nia sujere, atu investiga didiak veteranus sira, tanba uluk balun entrega tiha kilat ba Indonezia sira, depois servisu hamutuk fali ho Indonezia agora balun sai veteran fali.
Entretantu bainhira TDW koko konfirma asuntu ne’e ba iha Sekretariu Estadu Antigu Kombatente da Libertasaun Nasional maibe la konsege tanba Sekretariu Estadu Marito Reis la iha fatin.
