Diretor Ensino Rekorente,Filomeno Lourdes dos Reis Belo hateten, estudante analfabetu hamutuk 68 mil husi Distritu tolu sei gradua iha tinan ne’e.
“Hanesan hau hateten, estudante analfabetu iha distritu Baucau, Ermera no Liquisa mak sei gradua tan iha tinan ne’e,” informa Diretor Belo, semana kotuk (12/04) iha nia knar fatin Vila-verde, Dili.
Diretor Belo dehan, sira ne’e bele halo graduasaun ona tanba hatene lee no hakerek sira nia naran.
Tuir Diretor Belo, durante hala’o aprendizajen, Governu oferese livrus, kadernu , lapizeira, jerador, televizaun, CD, kadeira no meja oferese ho gratuita.
“Ita nia maun alin Timor oan mak hanorin, Cubanu sira hanesan asesor, sira mai fo orientasoens teknikas pedagojikas deit, sira la hanorin ida,” dehan tan Diretor Belo.
Total Profesor no Profesora sira ne’ebe mak hanorin analfabeto hamutuk ema 2.000 resin ne’ebe kobre iha teritoriu laran tomak.
Entertantu tuir membru Komisaun F Parlamentar, Deputada Maria Exposto katak, iha fiskalizasaun ne’ebe komisaun halo durante ne’e iha baze, nota katak komunidade barak mak seidauk hatene lee no hakerek.
“Entermus ba numeru ita bele hateten, analfabetismu iha Timor iha ona redusaun, mais ita rasik tun iha kraik, realidade hatudu barak mak la hatene lee no hakerek duni,” kritika Deputada Exposto.
