“PNTL preparadu hodi responde ba buat ruma ne’ebe maka mosu iha rai laran, liu-liu relasaun ho eleisaun, maibe atu hametin seguransa ho diak liu tan, ne’e la’os deit responsavel polisia deit maibe sidadaun hotu-hotu,” hateten II Komandante PNTL, Superintendente Afonso de Jesus, semana kotuk (20/04) iha Kaikoli, Dili.
Tuir II Komandante de Jesus, la’os deit ba iha eleisaun prezidensial maibe sira mos pronto atu fo seguransa ba iha komunidade iha eleisaun lejislasaun ne’ebe se tuir mai.
Enkuantu total membru polisia ne’ebe hatun no halo seguransa durante iha eleisaun iha II volta hamutuk 2.000.
“Uluk iha primeira ronde, ita iha deit polisia 1.500 maibe iha segunda volta iha 2.000 pesoas, ne’ebe seguransa garante duni,” hateten Xefe Departementu Informasaun Publiku Sekretariadu Tekniku Administrasaun Eleitoral (STAE) Satrunino Exposto Babo.
Iha parte seluk Fundasaun Mahein (FM) husu ba Polisia Nasional Timor-Leste (PNTL), atu hametin volume seguransa iha rai laran, liu-liu durante prosesu apuramentu no anunsia rezultadu final husi Tribunal Rekursu (TR) kona ba eleisaun prezidensial segundu ronde nian, nune’e labele mosu konflitu iha komunidade nia le’et.
“Kuandu seguransa fraku, ida ne’e loke dalan ou fo espasu bo’ot ba krime atu mosu,
maibe bainhira seguransa metin, ema la brani atu halo krime iha komunidade sira nia le’et,” hateten Peskizador FM Frei Guterres.
Tanba tuir Peskizador Guteres, hafoin (STAE) fo sai rezultadu provizoriu, ema balun komesa sunu uma iha Hera e ida ne’e akontese tanba failansu husi parte seguransa nian, e polisia tenke halo patrulamentu iha areas hirak ne’ebe risku ba konflitu.
Peskizador ne’e mos husu ba Kandidatu Prezidente (KaPrez) nain rua hodi hato’o ba nia militante no simpatizante sira, hodi simu rezultadu ne’ebe mak fo sai husi Sekretariadu Tekniku Administrasaun Eleitoral (STAE) noTribunal Rekursu (TR), atu nune’e la bele kria problema iha rai laran.
“Kuandu sira la aseita rezultadu ne’ebe iha, ne’e sei kria problema,” hateten Peskizador FM Frei Guteres, semana kotuk (19/04) iha Balide, Dili.
Tuir nia, iha kompetisaun ida laiha ema nain rua sai manan hotu, hakarak ka lakohi ida tenki lakon.
Entertantu Deputadu Arao Noe, informa Polisia iha distritu balun seidauk hatudu sira nia maturidade neutral 100 pursentu.
Tanba tuir Deputadu Noe, iha Komandante balun, fo instrusaun ba membru polisia sira, atu fo apoiu susesu ba kandidatu balun nian.
“Membru Polisia sira tenki tau an ba independent, lalika servisu favoritismu ba sel-seluk tanba asaun sira ne’e bele provoka fali instabilidade , tanba deit polisia la tau an neutral,” Deputadu Noe dehan.
Maske iha Polisa barak mak komportamentu kapas ba iha eleisaun, maibe iha balun sei servisu afavor ba kandidatu ida nian, Deputadu ne’e kestiona.
“Tanba ne’e ba iha eleisaun Parlamentar, hau husu tenki hatudu maturidade atu nune’e Polisia sai polisia ida professional,” Deputadu Noe sujere.
Iha fatin hanesan Deputadu Paul Martins dehan, desde hahu kampanha, eleisaun to’o STAE fo sai rezultadu provizoriu, situasaun iha rai laran kontroladu.
“Hau le’e jornal la hateten buat ida, hafoin lee jornal diariu mak iha insidenti ida ne’ebe akontese iha Uatulari, kareta Provedoria dos Dieritus Humanus I justisa (PDHJ) mak kareta ida (individu) ema tuda, maibe iha fatin seluk ita la rona buat ida,” dehan Deputadu Martins.
