“Iha rezultadu ne’e kandidatu Francisco Guterres Lu-Olo hetan votus 174.408, ne’e koresponde ba 38.77%, no kandidatu Taur Matan Ruak hetan votus 275.471, ne’e koresponde ba 61.23%. Bazea ba rezultadu sira ne’e, hau proklama katak kandidatu ne’ebe eleitor sira hili atu sai prezidente republika maka kandidatu Taur Matan Ruak,” dehan Prezidente TR, Claudio Ximenes, bainhira anunsia rezultadu eleisaun prezidensial, 23 Abril 2012, iha Kaikoli, Dili.
Prezidente Claudio Ximenes en nome orgaun soberania Tribunal Rekursu, fo parabens ba prezidente eleitu Taur Matan Ruak.
“Ne’e maka tribunal nia dezisaun e tribunal fo parabens ba Taur Matan Ruak nebe hahu iha dia 20 ba oin iha fulan Maiu, sei sai ita nia Presidente da Republika,” hateten Presidente TR Ximenes.
Prezidente TR, Ximenes dehan, tribunal hare tiha ona dokumentus hotu ne’ebe mai husi Komisaun Nasional ba Eleisaun (CNE), buat hotu-hotu la’o los tuir lei e hare mos katak apuramentu ne’ebe maka CNE halo los hotu.
Iha biban hanesan Portavos Prezidente eleitu Taur Matan Ruak, Fidelis Magalhaes,sente kontente ho rezultadu final husi TR ne’e.
”Ami sente haksolok ho rezultadu tribunal rekursu fo sai, rezultadu ne’e hatudu duni katak president elelitu agora ita iha ona maka Senhor Taur Matan Ruak,” dehan Portavoz Magalhaes.
Tuir Portavoz Magalhaes, Taur Matan Ruak prontu atu lidera nasaun ida ne’e tanba povu fiar ona TMR atu sai Presidente.
“Hakarak fo hatene katak Senhor Matan Ruak bem preparadu no prontu atu asumi reponsabilidade bo’ot ne’ebe maka povu fo fiar ba nia no sei simu tomada de pose iha dia 20 de Maiu fulan oin mai,” haktuir tan Portavoz Magalhaes.
