Hafoin tinan rua la hetan eletrisidade, oras ne’e dadaun komunidade uma kain 40 iha Sacato, Suku Nipane, Sub-distritu Pante Makasar, Distritu Oe-Cusse asesu ona ba iha eletrisidade tanba kompania Aquariius instala ona eletrisidade iha fatin ne’e.
“Ami uma kain hat nulu resin ho total populasaun hau kalkula besik atus lima resin inklui mos igreja, klinika, eskola no sede suku, ne’ebé iha tinan rua liu ba la hetan naroman listrik tanba deit sira tau gardu tuan no peralatan balun la kompletu, oras ne’e hetan ona iha semana ida liu ba,” dehan Komunidade Fernando Fina, semana kotuk (09/04) iha Distritu Oe-Cusse.
Tuir Komunidade Fina, ho asesu ba ahi, foin senti ukun an tanba durante ne’e sira la asesu ba ahi e agora bele hamenus ona osan atu sosa mina rai ka lilin.
‘’Ho naroman EDTL ne’e, ami foin senti hanesan foin ukun rasik aan, saida maka balun naroman, ami tur iha nakukun nia laran hola deit mina rai no lilin hodi sunu, osan sai ne’e maka’as liu fali osan tama,” dehan Komunidade Fina.
Entertantu Kordenador EDTL Distrito Oé-Cusse, Antão Cabal hateten prosesu finalizasaun instalasaun enerjia
eletrisidade ba populasaun uma kain 40 resin iha Sacato ne’e, realiza tanba esforsu maka’as entre EDTL ho kompania Aquarius.
‘’Sim hau hakarak informa deit, katak oras ne’e dadaun komunidade sira iha Sacato li-liu Bausiu ne’e hetan ona enerjia eletrisidade,” hateten Kordenador Cabal.
Tanba ne’e, nia parte husu ba klientes hotu, atu hamate ahi no sasan eletroniku ne’ebe uza enerjia eletrisade, atu nune bele poupa enerjia.
Iha sorin seluk Klientes EDTL, Francisco Elo hateten, sira prontu atu la’o tuir regras ne’ebe mak iha.
“Naran katak nai ulun sira foti desizasaun ne’e klaru, no labele halo diskriminasaun, ami hanesan povu prontu atu kumpri naran katak intensaun diak,” dehan Kliente Elo.
