“Vitima bainhira la aprezenta maibe iha vizinu ruma ka ema ruma iha konesementu, ema sira ne’e bele aprezenta keisa tanba ne’e krime publiku,” hateten Prokurador Distrital Distritu Baucau Aderito Tilman, semana kotuk, Distritu Baucau.
Tuir Procurador Tilman, iha kazu barak mak to’o ona iha Ministerio Publiku (MP) ka to’o ona iha Tribunal maibe vitima hakarak dada fali hodi rezolve fali tuir familia maibe ida ne’e labele ona.
Prokurador Tilman dehan, nia prosedimentu kriminal tenki la’o nafatin, laiha dalan para halo mediasaun krime ne’e nia natureza publiku, “tenki to’o iha julgamentu juis deside konforme prova ne’ebe mak Ministerio Publiku indika iha nia akuzasaun,” Prokurador Timlman esplika.
Dala barak vitima sira la ba halo tratamentu iha hospital, laiha testamunha ruma mak hatene no hare e polisia mos laiha kondisaun para hasai fotografia ba vitima sira nia isin ne’ebe hetan kanek tanba nia la’en baku.
“Maibe laiha dalan para atu halo mediasaun ,laiha dalan para dalan para dada fali krime ne’ebe kona ba Violensia Domestika,” Nia katak.
Iha parte seluk Diretor Fundasaun Educasaun Komunidade Matebian Baucau, Lino Lopes hateten kazu sira hanesan ne’e prosesu to’o iha Tribunal e husi feto ninian husu atu dada fila kazu ne’e ho sistema familiar .la signifika dada fila fali ne’e prosesu la kontinua iha Tribunal.
“Hanesan kazu ne’ebe akontese iha Quelecai kazu ne’e violensia domestika parte rua iha ona konkordansia sira dame familiar maibe prosesu la para,”hateten Diretor ECM Lopes.
Tuir Director Fundasaun ECM Lopes katak ida ne’e iha deit level tradisional no familia ninian atu mas prosesu ne’e kontinua lao to’o iha Tribunal, e Tribunal fo pena suspensaun ba arguido laos dehan atu dada fila depois fo perdaun total ne’e laiha .
Entaun iha kazu balun mak parese ke akontese hanesan ne’e maibe iha kazu balun sira halo prosessu to’o iha Tribunal hafoin maka remata
Tuir Fundasaun ECM nia hare katak kazu sira ne’ebe dada fila fali ne’e tamba aspetu kultural,Economia tamba feto dala barak moris dependente deit ba mane.
