Prezidenti Parlamentu Nasioanal (PN), Fernando Lasama de Araujo preokupa ho kondisaun komunidade sira iha Sub-distritu Atauro, tanba komunidade balun deit mak asesu ba eletrisidade, e balun la’e.
“Sekretariu Estadu Eletrisidade Agua e Urbanizasaun, dehan atu haruka jerador iha Comoro atu haruka ba iha tinan kotuk maibe to’o ohin loron la iha realizasaun,” preokupa Prezidenti PN,Lasama, semana kotuk,(10/04) iha Uma Fukun, Dili.
Tuir Prezidente Lasama, eletrisidade iha Sub-distritu Atauro ne’e mate durante fulan barak nia laran maibe Governu liu-liu Ministeriu kompetente seidauk haruka jerador, nune’e bele halo moris fali.
“Nebe Komisaun G nebe servisu ba ida ne’e komunika ba Sekretariu Agua e Eletrisidade atu haruka jerador ne’e ba lalais,” sujere Prezidenti Lasama.
Entertantu Vise Prezidenti Komisaun G Parlamentar, Deputadu Inacio Moreira dehan, eletrisidade mate la’os deit iha Atauro, maibe iha Sub-distritu Pasabe-distritu Oecusse, fulan ida ona ahi la lakan maibe Governu la hadia.
“Governu Xanana nebe mak agora dadauk infrenta mak, sira la iha ema ida ke kapas, iha kapasidade para halo jestaun,” Deputadu Moreira kritika.
Tannba ne’e, nia parte husu ba ministeriu kompetente atu hare kestaun ne’e, tanba problema ne’e nesesidade baziku liu ba povu.
Enkuantu bainhira TDW koko konfirma asuntu ne’e ba iha Sekretariu Estadu Eletrisidade Agua e Urbanizasaun, maibe la konsege tanba Sekretariu EStadu Januario Perreira laiha fatin.
