Relasiona ahi eletrisidade ne’ebe la funsiona ho diak iha Sub-distritu Atauro, komunidade sira iha fatin ne’eba, oras ne’e dadaun la asesu ba bee moos.
“Fura tiha bee iha Atauru neba, bee iha fatin rua kapas teb-tebes mais hein hela bainhira mak enerjia to’o ba,” hateten Prezidente Parlamentu Nasional Fernando Lasama de Araujo, semana kotuk (10/04), iha Parlamentu Nasional.
Tuir Prezidenti Lasama, fura bee ne’e remata iha fulan Marsu 2011, maibe komunidade sira labele hetan bee moos, tanba eletrisidade la lakan e komunidade sira seidauk bele uza bee ne’e to’o agora.
“Komisaun G nebe mak servisu ba ida ne’e, bele komunika ho sekretariu estadu Eletrisidade Agua e Urbanijasaun atu haruka Jerador ne’e ba iha Atauru atu bele ajuda lakan, no ajuda bee ba populasaun iha neba,” Prezidente Lasama sujere.
Entertantu Vise Prezidenti Komisaun G, Deputadu Inacio Moreira dehan, bee fura hotu tiha ona maibe la sai tanba falta de jestaun husi Governu.
“Ami tenki fo orientasaun fo informasaun ba iha Governu ba iha Ministeriu kompetente para urjentimentu tenki hare ba preokupasaun ida ne’e tanba ida ne’e nesesidade baziku nebe ita nia povu presiza liu,” Deputadu Moreira dehan.
Wainhira TDW tenta konfirma asuntu ne’e ba iha Sekretariu Estadu Eletrisidade Agua e Urbanizasaun, maibe la konsege tanba SE. Januario Perreira laiha fatin.
