Komunidade Sucu Abani, Sub-Distritu Pasabe, Distritu Oe-Cusse Agustinho Poto informa katak fulan ida ona sira la asesu ba ahi, tanba jerador ne’ebe fornese eletrisidade ba sira hetan avaria.
“Ami iha tanggal 4 Marsu ne’e la hetan ona listrik tanba dehan generator nia kenal pot maka at, ne’e mak ahi la lakan hanesan ne’e,” hateten Komunidade Poto, semana kotuk (02/04) iha Distritu Oe-Cusse.
Situasaun ne’e fo impaktu ba estudante sira atu estuda bainhira iha tempu kalan, enkuantu komunidade sira laiha kapasidade atu sosa mina rai.
“Ita nia oan sira kalan estuda ladiak ida, kalan nakukun sira la estuda tanba naroman la iha, atu hola lilin no mina rai osan la iha. Mina rai litru ida agora nia folin satu dolar ba leten e iha posibilidade atu sa’e liu tan,” Komunidade Poto dehan.
Sorin seluk Komunidade Jacinto Bui hateten, presiza resolve lalais kestaun ne’e, tanba Sub–Distritu Pasabe geografikamente halo fronteira ho nasaun Indonezia hodi nune la bele hatun imajen nasaun nian.
“Ita nia governo tenke tau matan, resolve ho lais, tanba sei la’e hatun ita nia imajen ho nasaun Indonezia, nota katak ita nia dezenvolmentu la’o iha fatin deit, ahi kadaves lakan-mate,” Komunidade Bui katak.
Entertantu Administrador Sub-distritu Pasabe, Antão Ulan husu ba funsiunariu EDTL iha DistrituOe-Cusse atu lalais resolve problema avariasaun jerador ne’e nune’e funsiona fali.
“Hau sujere ba sira, kuandu la konsege resolve diak liu funsiunariu sira tun mai apoiu serbisu EDTL sentral Oé-Cusse, atu nune la bele hein deit fulan simu osan saugati deit,” Administrador Sub Distrito Ulan husu.
Hatan ba preokupasaun ne’e, Kordenador EDTL Distritu Oé-Cusse Antão Cabal katak, nia parte iha haruka ona tekniko ba Pasabe hodi resolve problemane’e.
“Ami nia kolega, ohin hau haruka ba tiha ona atu identifika saida maka at para nune bele resolve iha tempu badak nia laran, konaba eletrisidade la lakan fulan ida ona ne’e hau la hatene tanba nunka hetan relatoriu husi Pasabe,” Kordenador Cabal tenik.
