Tuir Diretor Jeral Sekretariu Estadu Formasaun Profesional e Empregu (DJ-SEFOPE), Jacinto Barros Gusmão, katak atu garantia direitu trabalhadores Timoroan sira ne’ebe hala’o servisu iha Irlandia no Englatera, SEFOPE monta ona adidu do trabalho ida liu husi Embaixada Portugal iha Englatera.
“Ami husu ba maluk trabalhadores Timor oan sira ne’ebe atu ba hala’o servisu iha Englatera no Irlandia, diak liu fo dadus kompletu ba ita nia adidu iha Embaixada Portugal iha Englatera, para iha problema ruma it abele tau matan lalais,” dehan diretur Gusmão, Semana kotuk (03/04) iha knar fatin Kaikoli Dili.
Tuir DJ Gusmao, Maria Guterres ne’ebe agora dadaun hala’o hela servisu iha Englatera, nia mak nudar adidu do trabalho, hodi fo asistensia ba trabalhadores Timor oan sira iha Englatera.
SEFOPE rasik la hatene numeru klaru kona ba trabalhadores Timoroan hira mak agora dadaun hala’o servisu iha Irlandia, tanba trabalhadores sira ne’e ba ho privadu.
“La’os entre governu hanesan trabalhadores iha Korea de Sul ho Australia, maibe tuir informasaun, iha trabalhadores hamutuk rihun walu mak servisu iha ne’eba,” dehan DJ Gusmao.
Iha parte seluk Prezidente Konfederasaun Sindikatu Timor-Leste (KSTL), Jose da Conceição da Costa hateten, trabalhadores timor oan ne’ebe halao servisu iha nasaun rua ne’e, iha kondisaun diak tanba maioria membru sindikatu.
“Ami so tau kestaun no preokupa hela mak trabalhadores sira ne’ebe hala’o servisu iha Korea, e agora dadaun ami sei buka halo hela jaringan ho sindikatu sira iha Korea,” preokupa Prezidente da Costa.
Nia hatutan KSTL rasik seidauk hatene klaru kona ba numeru trabalhadores iha nasaun rua ne’e, maibe sira sei esforsu aan buka hatene numeru klaru trabalhadores no servisu saida mak sira hala’o iha ne’eba.
