“Hau fiar katak hau sei manan iha segunda ronda hanesan ezame ultimo dia no sai Presidente ba povu tomak atu bele garante paz no estabilidade iha rai laran no mos halo koperasaun ho nasaun seluk hodi lori dezenvolvimentu nasaun ida ne’e nian iha futuru,” hateten kandidatu Presidensial No. 1 Lu-Olo bainhira tuir votasaun iha Eskola Primario No. 02 Farol Dili, iha tuku 7:23 dadersan 16 Abril 2012.
Lu-Olo haktuir tan katak loron ohin inportante tebes ba povu Timor–Leste atu hakat ba kabina de votu hodi deside vitoria rasik ba kandidatu nain rua ne’ebe pasa ba segunda ronda tuir sira nia konsensia.
Kandidatu Lu-Olo akompanha husi nia kaben ho Sekretario Jeral Partido FRETILIN, Mari Alkatiri, inklui mos ekipa susesu kandidatu nian to’o iha fatin sentru votasaun.
Iha parte seluk votantes Manuel Soares hateten katak oportunidade ida ne’e importante tebes tanba liu husi elisaun povu bele determina lideransa ida ne’ebe mak diak hodi lori dezenvolvimentu nasaun ne’e ba oin tanba lejitimidade ne’e mai husi povu entau tenke servi duni povu iha pais ida ne’e labele sai lideransa ba organizasaun ou partido ida.
“Hau hanoin lideransa ne’ebe ami hili pesoal hau ne’e la sala tanba kandidatu nain rua ne’e ida mai husi partido no ida indepedente nune’e mos iha esperiensia atu deriji no lori nasaun ne’e ba oin tanba ami bainhira ami hili ami rona ona sira nia vizaun no misaun iha loron kampanha,” dehan votantes Soares.
Nia hatutan katak iha sentru votasaun ne’e lao ho hakmatek nia rasik sente seguru tanba laiha intimidasaun ruma iha fatin votasaun nun’ee mos hetan seguransa masimu husi polisia nasional Timor–Leste inklui mos UNPOL sira.
