Kandidatu Prezidente da Republika Francisco Guteres Lu-Ola hateten wainhira eleitu Prezidenti da Republika Timor-Leste sei garante paz no estabilidade iha rai laran hodi alkansa dezenvolvimentu nasaun ne’e lao ba oin.
“Hau sei kopera hamutuk ho orgaun sira seluk, sei la halo opozisaun ba iha Governu ka Parlamentu nasional,” hateten kandidatu Lu-Olo iha estudio Radio Televizaun Timor-Leste, durante debate ao vivo foin lalais (13/04).
Nia hateten mos katak nia sai eleitu nia sei kumpri tuir knar prejidenti da republika nian tuir konstituisaun haruka.
“Hau iha tan komprimusiu ida tan katak, atu halo ezersisiu poder politiku ninian no hau sei uza demokrasia nudar prinsipiu ida nebe importante tebes-tebes para atu sai prezidenti da republika nudar orgaun soberania ida,” kandidatu Lu-Olo dehan.
Atu sai prezidenti da republika nia sei rona opiniau husi sosiedade sira nian ba vida povu ninian.
“Estatuta prezidenti da republika ninian para atu bele hato’o opiniaun saida mak afeta iha povu ida ne’e nia vida no solusaun saida mak Governu buka atu responde lalais nesesidade povu ida ne’e ninian.”
Karik eleitu nudar prejidenti da republika nia sei hakruk ba lei tuir konstituisaun haruka.
Nia husu ba povu tomak katak atu sai Prejidenti da Republika povu mak sei determina maibe kadeira iha prezidenti da republika nian iha palasio prezidensial Aitarak-Laran laos ba ema nain rua.
“Maibe hau hakarak transmiti ba ita bot sira katak, ita bot sira soberania nebe bot tebe-tebes hodi hametin soberania ne’e rasik nebe mak ita bot sira mak hili para atu tau iha kadeira ida neba.” Wainhira nia eleitu nia sei respeita povu tomak nia vontade hotu.
“Hau hakarak tur iha kadeira prezidenti da republika nian iha Aitarak-Laran ho dignidade no integridade moral I hau nia oin hanesan sidadaun Timor-leste, hanesan povu ida ne’e nia oan hodi respeita inan aman nia desiajaun liu husi votu para hau tur iha kadeira laran,” kandidatu Lu-olo tenik.
Lu-olo hateten mos katak nia atu sai prejidenti da republika sei hakuak povu tomak para lori dejenvolve rai ida ne’e ba oin.
“Atu lakon karik ita bot sira nia votu mak husik hau la sae ba prezidenti maibe desizaun ita bot sira nian hau fiar wainhira hau lakon karik lakon ho dignidade.”
Nia husu wainhira kandidatu entre sira nain rua ida manan no ida lakon tenki simu labele lakon halo fali terror ba ida seluk tenki kopera respeita ida nebe manan atu sai aman ba nasaun no Povu tomak hotu.
