“Hau konfiansa boot sei eleitu iha tinan ida ne’e. Iha historia tinan 10 kandidatu Prezidente independente sempre manan tanba ne’e hau fiar katak hau sei manan iha elisaun ne’e,” hateten Kandidatu Presidensial TMR hafoin vota iha sentru votasaun iha Eskola Primaria Metiaut hafoin tuku 10:00 dadersan ohin 16 Abril 2012.
Nia mos hatutan katak kandidatu nain rua ne’e sei simu dezisaun husi povu Timor-Leste e agradeze mos ba komunidade tomak tanba bele partisipa iha elisaun segunda volta ne’e ho entuziasmu.
“Hau kontenti tanba povu sira mai intusiasmu makas par tuir elisoens. Ida ne’e ezerse nia direitu atu vota no liberdade atu hili entre kandidatu rua ne’e. Ida par atu sai prezidente ba povu Timor. Rezultadu nebe maka iha kandidatu nain rua ne’e sei simu tuir lian ita nia povu nian,” hateten Kandidatu TMR.
Nia mos apelu ba komonidade tomak katak povu Timor mantein kalmu no disiplina, sivismu para dala ida tan Timor bele fo ezemplu diak ida ba mundu.
“Hatudu katak ita bele. No hatudu katak nasaun ne’ebe maka iha nia dignidade no nasaun ne’ebe maka iha nia futuru.”
TMR akompanha hosi nia kaben ho mos nia ekipa susessu.
Entretantu komunidade votante Elidiu Magnu dehan nia senti seguru tebes durante eleisaun ne’e.
“Hau senti seguru tebes tuir elisaun iha segunda volta ne’e. Nudar Timoroan ne’e hanesan dever ida ne’ebe maka ami tenki halo, no vota tuir ami nia konsensia,” hateten votante Magnu hafoin tuir vota.
Iha lidun hanesan komonidade vontante Afonsu Ximenes dehan mos katak nia hanoin mak se-se mak mana votasaun tenki tau matan ba povu nia terus.
“Wainhira kandidatu nain rua ne’e se-se maka sei eleitu tenki hare povu nia terus no rona povu nia halerik. Labele hare deit ba interese pribadu, tanba wainhira sai prezidente ne’e povu mak hili ne’e duni tenki hare no rona povu nia preokupsaun” haktuir tan votante Ximenes.
