Servisu Investigasaun Criminal (SIC) rejistu ona kazu Violensia Domestika (VD) hamutuk 142 kazus durante fulan Janeiru to’o Marsu tinan ne’e, no kazus hirak ne’e agora iha ona Tribunal Distrital sira iha Distritu tanba ne’e krimi publiku.
“Tinan ida ne’e hahu husi fulan Janeiru ate Marsu, ita rejistu ona violasaun iha uma laran ka violensia domestika hamutuk sentu kuarenta e dois (142) kazus,” hateten Diretor SIC Calisto Gonzaga, semana kotuk (10/04) iha nia knar fatin Kaikoli, Dili.
Diretor SIC hatutan, kazus hirak ne’e mai husi Distritu 13 nia laran, tanba ne’e husu ba ema hotu nia kontribuisaun no tau konsiderasaun atu redus numeru VD iha rai laran.
Enkuantu tuir dadus ne’ebe SIC iha, kazu VD la’en hasoru fen ka oan durante tinan 2011, hamutuk iha 690 kazus, e agora tama ona iha prosesu Tribunal no kazus sira ne’e maioria husi Distritu Dili, Oe-Cusse no Liquisa.
Iha parte seluk Prezidente Grupu Feto Parlamentar Timor-Leste (GMPTL), Josefa Alvares Soares hateten, durante halo fiskalizasaun, rekonese katak iha duni feto barak mak sei sofre ba violensia uma laran.
Prezidente Soares afirma, violensia domestika akontese tanba sira falta informasaun kona ba lei violensia domestika nian.
“Ita presiza halo mak sosializa nafatin ba povu, labele iha nasional deit maibe to’o iha area rurais katak violensia iha uma laran ne’e krime publiku ona, lalika tauk atu ba kesar liu-liu feto maluk sira ne’ebe iha area rurais,” Prezidente GMPTL Soares katak.
Tuir nia, feto barak sai vitima husi sira nia la’en, maiibe lakohi keixa tanba sira tauk soe malu, e ida ne’e dilema bo’ot ida.
“Hau husu ba feto maluk sira atu sai hanesan bee atu hamate ahi ne’ebe lakan makas ona iha uma laran, labele sai fali ahi, entau bele han hotu sasan sira iha uma laran katak nudar inan, bin ida hasoru problema iha uma laran buka atu rezolve ho ulun malirin,” apela Prezidente GMPTL Soares.
