Moras dengue ne’ebe afeta maka’as ba labarik sira durante fulan hira ba kotuk, oras ne’e dadaun pasiente ba moras ne’e komesa menus iha Ospital Nasional Guido Valadares (HNGV) no Sentru Saude (SS) sira iha teritoriu tomak, inklui mos iha Klinika Privadu sira, tanba Ministeriu Saude (MS) halo fomigasaun tama sai bairo sira.
“Atu kompara ho fulan hirak liu ba ne’e moras dengue makas los sampai ami buka fatin koridor sira hotu atu fo tratamentu, maibe iha fulan Marsu komesa tun maka’as liu katak ami rejista liu husi sala emerjensia hamutuk 27,” hateten Xefe Departamentu Sala Emergensia HNGV, Enfermeiru Americo dos Santos, semana kotuk (28/03) iha HNGV, Bidau Toko Baru, Dili.
Xefe dos Santos hatutan, pasiente dengue ne’ebe agora dadaun hala’o tratamentu iha HNGV maioria husi labarik husi bairo Farol, Delta, Becora, Colmera, Surikmas no distritus sira.
Xefe dos Santos haktuir, iha fulan hirak liu ba, moras dengue ne’ebe tama iha HNGV iha sala emerjensia hamutuk pasiente 436, maioria labarik inklui mos adultu sira no nain 11 mak lakonsege salva sira nia vida (mate) tanba lori mai tarde.
“Ho akontesementu ne’e halo pesoal saúde, komunidade no entidade sira hotu inklui mos governu hakfodak, hodi hala’o aktividade limpeza jeral iha kapital laran no bairo, e ministerio saúde halo kedas halo fomigasaun iha bairo ne’ebe risku ba dengue, atu labele hada’et ba ema seluk e to’o ikus konsege duni redus numeru ne’ebe iha,” Xefe dos Santos tenik.
Iha parte seluk Diretor Klinika Bairo Pite (KBP), Doutor Daniel Murphy hateten, moras dengue mosu tanba komunidade soe foer arbiru deit no lau tau iha fatin lixu nian.
“Ami hare moras epidemia, dengue ka deman berdarah, kazu barak maibe agora menus oituan ona, la’os laiha la’e maibe menus,” dehan Doutor Dan.
Tuir Doutor Dan, pasiente ne’ebe halo tratamentu iha KBP, dalabarak liu-liu labarik, bebe sira nia isin kanek hotu, ne’e perigozu ba nia saude no bele mate.
“tanba hijiene Timor ladiak, laiha bee moos no saneamentu ne’ebe seguru e mos laiha sabaun, ema kiak barak liu, entaun sempre terus,” dehan Doutor Dan.
“Hau nia hanoin bee moos importante tebes, se laiha bee moos ema senpre terus, moras hela deit hanesan kulit kanek entau bele provoka moras barak,” dehan tan Dr. Dan.
