Tuir Diretor Jeral Sekretariu Estadu Formasaun Profesional e Empregu (SEFOPE), Jacinto Barros Gusmão katak, projetu empregu rural ne’ebe lolos iimplementa iha Marsu, maibe la realize tanba sei iha faze rekolha no avalia ba proposta ne’ebe tama.
“Proposta mai husi suku hamutuk 442 no iha suku balun hatama ho aldeia, e proposta ne’ebe tama iha ami ne’e hamutuk 1.200 resin ne’ebe ami tenke hare didiak no halo avaliasaun hodi proposta ne’ebe hetan aprovasaun ekipa teknika husi nasioanl tun iha baze atu hare tanba projetu empregu rural ita tenke fahe servisu ba ema hotu iha area rural,” hateten Diretor Jeral Gusmão, semana kotuk (03/04) iha nia knar fatin Kaikoli, Dili.
DJ. Gusmao afirma, total orsamentu husi Orsamentu Jeral du Estadu (OJE) 2012 nian, ba projetu empregu rural hamutuk US$ 20 milioens. Projetu hanesan loke estrada foun, rehabilita estrada.
“Estrada foun iha area rurais, e SEFOPE laiha kompetensia atu hadia estrada no ponte ne’ebe ho kualidade diak hanesan alkatraun, SEFOPE nia kompetesia so atu fo servisu ba povu iha area rurais atu hetan osan no asesu ba Estrada,” dehan DJ. Gusmao.
Iha parte seluk Administrador Distritu Liquisa, Domingos da Conçeicão dos Santos hateten Administrador Distritu no Sub-distritu inklui mos autoridade local sira hala’o ona enkontru ho SEFOPE iha dia 08 Fevereiru, hodi bele implementa projeitu $3 ba komunidade iha area rurais sira.
“Proposta ami hatama tiha ona direitamentu ba SEFOPE agora ami hein deit bainhira mak implementa no sira lokaliza osan ba distritu atu jere kona ba projeitu $3 dolar,” dehan Administrador dos Santos, semana kotuk (30/03) iha Distritu Liquisa.
Nia hatutan, iha Distritu Liquisa rasik iha suku hamutuk 23, suku 22 mak hatama proposta no ida la hatama no aldeia sira ne’ebe iha sidade Liquisa lahatama proposta maibe sira ne’ebe iha area rurais liu ne’e hatama hotu.
