Ajensia Koperasaun Internasional Japaun nian (JICA) entrega ekipamentus hanesan komputador, kamera no seluk tan ba Fakuldade Enjenaria iha Universidade Nasional Timor-Leste (UNTL) iha Kampus Hera.
“Governu Japaun fo asistensia iha aspetu hat ka lima, ida mak ajuda fo bolsu estudu ba prpfesores sira hodi kontinua sira niA estudu doutoramentu iha Japaun, ida fali Profesor husi Japaun no ITS husi Indonezia mai fo apoiu ba Dezenvolvimentu kurikulu iha Fakuldade Enjenaria no Siensia Teknolojia, fo formasaun ba estudante sira balun, aspeitu ida seluk mak Instituisaun Fakuldade ninian, e aspeitu ida tan mak apoiu ekipamentus,” hateten Reitor UNTL, Aurelio Guteres, semana kotuk,(28/03) iha Kampus Hera.
Ekipamentus hirak ne’e mak hanesan komputador, kamera rekaman, kamera fotografer, solar panel, projector no makina fotokopia.
Reitor Guterres hatutan, apoiu ida ne’e bele ajuda estudante sira hodi halo aprendizajen, peskiza iha Fakuldade Engenaria liu-liu iha kursu Enjenaria Sivil, Mekanika no Elektro Teknik.
“Ajuda ne’e hanesan ohin hau hateten ba Profesor Timor oan sira mesmu Governu Japaun ou Povu Japaun iha situasaun difisil, mais iha komprimisiu mai ita kontinua apoiu sira ne’e, oinsa ita bele utiliza sasan sira ne’e ho didiak ba peskiza no mos aprendizajen,” Reitor Guteres tenik.
Entertantu Xefe reprezentante Ajensia JICA, Hirohiko Takata hateten, pilar importante ba programa JICA mak fo apoiu ba universidade sira tanba dezenvolvimentu rekursu humanus ba Timor-Leste importante tebes liu iha area siensia no teknolojia.
“Projetu Capacity Development of Faculty of Enginering, Sience and Technology in National University Timor-Leste (CADEFEST ) ne’e hanesan koperasaun tekniku, suporta husi JICA tanba ita hotu hatene iha 2000 no 2006 buat hotu-hotu estraga ,entaun JICA konstrui fila fali fakuldade ida ne’e,” hateten Xefe Takata.
Tuir Takata, JICA seidauk fo apoiu ba fakuldade sira seluk, so deit ba fakuldade enjenaria, “Ami esperansa katak, iha ami nia apoiu ida ne’e fasilita diak liutan oinsa mak bele Dezenvolve rekursu humanus diak liutan iha siensia no tecnolojia ninian,” Xefe Takata esperansa.
Xefe Takata afirma, dezenvolvimentu rekursu humanus hanesan elementu esensial iha sosiu ekonomiku no konsidera tebes Ensinu Superior tenki kontinua esforsu atu dezenvolve kapasidade peskiza, no kria embairomentu iha edukasaun nebe propriu.
Iha serimonia entrega ekipamentus ne’e, partisipa husi Reitor UNTL Aurelio Guteres, Reprezentante Xefe JICA Hirohiko Takata, Embaixador Japaun Tonotaka Yoshimura,Profesor nain lima mai husi Universidade Japaun, Xefe Dekanu Enjenaria Gabriel Antonio Desa, inklui Dosente sira iha Fakuldade Enjenaria nia laran.
