Provedoria Direitus Humanu no Justisa (PDHJ) sei mantein halo monitorizasaun ba iha eleisaun prezidensial segundu ronde, hodi hare violasaun direitus umanu durante eleisaun la’o.
“Ami sei kontinua halo fali iha segundu ronde nebe durante ne’e buat ruma la’o la los iha primeriu ronde, ami sei hadia fila fali iha segundu ronde, ne’e katak la’os deit ami nia ekipa mak karik iha buat ruma ke la’o seidauk diak tanba rekursu menus, pur ezemplu ami tenki aumenta tan ami nia rekursu iha segundu ronde ne’e,” hatete Provedor Direitus Humanu no Justisa Sebastião Dias Ximenes, semana kotuk (28-03) iha Kaikoli, Dili.
Tuir Provedor Ximenes, iha eleisaun primeriu ronde sira hetan dificuldade atu kobre distritu hotu iha tempu votasaun tanba tenki vota iha fatin nebe registu, maibe iha segundu ronde ne’e parte PDHJ mos sei koopera hamutuk no husu ba STAE no CNE para bele fo oportunidade ba PDHJ atu bele tuir vota iha fatin nebe PDHJ halo monitorizasaun.
“Iha primeria ronde ne’e ami la monitoriza to’o votasaun, tanba ami labele vota iha fatin nebe ami ba halo hela monitorizasaun, ami tenki fila mai Dili tanba ami nia ekipa ne’e barak liu iha Dili, vota hotu tiha mak ami fila ba distritu, nebe distritu nebe maka dok ne’e ami labele to’o,” katak Provedor Ximenes.
Entertantu tuir Membru Komisaun A Parlamentar, Deputadu Mario Carrascalao katak, ne’e hanesan aktividade positive tanba knar PDHJ atu hare liu ba violasaun direitus umanu iha tempu eleisaun.
“Sira hare liu violasaun direitu umanus iha tempu eleisaun, iha duni ga la’e ne’e sira nia direitu duni, atu foti kestaun sira ne’e lori ba provedoria de Justisa. Hau nia hanoin aktividade monitorizasaun nebe maka PDHJ ne’e buat ida nebe maka positive,” dehan Deputadu Carrascalao.
