Diresaun Servisu Agrikultura, Pesca no Florestal, (DSAPF) Distrito Oé-Cusse hahu identifika plantasaun agrikultor sira nian nebe hetan estragus husi anin bo’ot iha fulan kotuk, nune’e sira nebe sai vitima bele hetan ajudus husi governu.
“Oras ne’e dadaun ami nia ekstensionista sira foti hela dadus namanas husi agrikultores iha Suku 18, atu hetan dadus konkretu husi estragus plantasaun alimentar hanesan batar, hare aifarina, no seluk-seluk, atu nune hato ba diresaun nasional para bele hetan ajudus ruma,” hateten Diretor DSAPF Jose Oki, semana kotuk (22/03) iha Santa Rosa Distritu Oe-Cusse.
Diretor Oki informa, dezastre naturais ne’ebé mak foin lalais akontese kuaze suku sanulu resin walu maka infrenta tanba ne’e iha posibilidade bo’ot to’os na’in sira sei la hetan produsan diak iha tinan ne’e.
Iha sorin seluk Administrador Distrito Oé-Cusse, Jose Anunu fo ona autorizasaun ba liderasna komunitaria atu halo levantamentu de dadus kona ba estragus ba uma no ai horis (plantasaun) komunidade nian.
“Hau fo hatete ona ita nia lideransa komunitaria sira atu foti ona naran ba vitima dezastre naturais atu nune bele relata ba kona ba estragus uma, to’os rai hala’i hafoin hatutan ba diresaun dezastre naturais diresaun nasional,” Administrador Anunu afirma.
Entertantu Pontu Fokal Dezastre Naturais Distritu Oé-Cusse, Cornelio da Cruz informa oras ne’e dadaun aloka ona ajudus emerjensia ba vitima sira ne’ebé mak nia uma hetan estragus.
“Apoiu emerjensia ne’ebé maka oferese hanesan biti, lipa, sabaun, lona, kelambu hahan latarias, no fos. ami iha ne’e mos sasan emerjensia nian iha armajen mos la dun sufsiente atu responde, maibe hau tenta relata ba iha nasional no kopera ho ajensia interansional ne’ebe mak bele ajuda ita atu bele buka solusaun ho imediatamente,” hateten Pontu Fokal da Cruz.
Hatan konaba apoiu ba dezastre estragus palntasaun Cornelio da Crus hateten ne’e depende fali ba desizasaun governo sentral bazea ba dadus Departementu Agrikultura Floresta e Peska Distritu Oé-Cusse .
‘’Kona ba estragus plantasaun ne’e membro ekipa dezastre naturais sei tun hola dadus ,maibe ne’e sei depende fali ba parte MAFP nia kompentesia, ita so hare deit ba estragus uma nian no sel-seluk tan maibe hau tenta hato ba nasional,” Da Cruz tenik.
Tuir observasaun TDW iha vitima sira nia hela fatin nota katak vitima sira komesa hadia fali sira nia uma ne’ebé maka hetan estragus ne’ebe maka halo ho provizorimente alias didin kalen, tali tahan, no piku.
