Iha fiskalizasaun Membru Komisaun H Parlamentar iha Distritu Oe-Cusse, identifika katak Eskola Sekundariu Publiku (ESP) Palaban falta bee moos iha sira nia sintina, e estudante sira tenke halai ba iha du’ut laran.“Mestri hamutuk 30 resin,estudante hamutuk 500 resin, sira la asesu ba casa de banho,” levanta Deputadu Antonio Cardoso iha plenaria Parlamentar, semana kotuk,(02/04) iha Uma Fukun, Dili.
Tanba ne’e, Komisaun H husu ba Ministeriu kompetente atu rezolve lalais problema ne’e.
“Ita ba-bain dehan katak, saude iha ita nia liman rasik mais kondisaun deit ita la prepara, bee deit mos la iha, kanalizasaun mos bee la iha,” Deputadu Cardoso preokupa.
Entertantu Deputadu Estanislao da Silva hateten, ida ne’e rezultadu husi projetu Pakote Referendum (PR) nian, tanba hafoin Komisaun C halo nia fiskalizasaun iha Distritu Suai, implementasaun PR iha eskola failha 100 pursentu.
“Entaun hau hare katak buat ida kontratu entrega ba ida ne’e, entrega ba ida neba, ne’e ladiak,” kritika Deputadu da Silva.
Tuir Deputadu ne’e, la’os lakohi atu valorize emprezariu nasionais, maibe projetu emerjensia ne’ebe halo iha Dili laran mos halo ema hotu preokupa.
“Foin dadauk ami Komisaun C halo fiskalijasaun iha Suai, ema nebe responsavel edukasaun nian hateten ba ami katak, pakote referendum iha Suai failha 100 pursentu,” Deputadu da Silva katak.
Entretantu wainhira TDW tenta konfirma asuntu ne’e ba iha Ministeriu Edukasaun maibe la konsege tanba Ministru Joao Cancio desloka tiha ona ba Angola.
