“Maske ita nia konstituisaun hakerek ona katak multi partidaria ne’e realidade ne’ebe konsagra iha ita nia konstituisional tanba ne’e iha Timor-Leste mosu partido barak maibe lia fuan ida deit unidade no diversidade,” dehan Senado Verdial, semana kotuk (22/03) iiha lansamentu ba forum komunikasaun ba lideransa joventude partidus politikus, iha Farol, Dili.
Senado Verdial afirma, kualker partidus politikus ida ukun, nia sei ukun nasaun no povu la’os ukun nia militantes no simpatizantes tanba ne’e importante liu atu partidu ki’ik ka bo’ot hamutuk hametin unidade nasional.
Nia hatutan, estudante no joventude nia papel mak sei hamrik hodi koalia kona ba interese nasaun nian, “la’os interese partidaria nian hodi garantia estabilidade paz iha prosesu dezenvolvimentu rai doben ida ne’e, pronto atu kolabora ho sosiedade sivil no organizasaun partidos politikus sira ne’ebe hamrik ho independente,” nia katak.
Iha oportunidade hanesan Prezidente Conselho Congresu, Ricardo Ribeiro hateten joventude mak futuru nasaun no prezidente iha futuru tenke hatudu kreativu nudar joventude atu bele kontribui ba dezenvolvimentu nasaun ida ne’e nian.
“Iha hau nia organizasaun ami la adera ba partidu ida maibe ami nafatin kaer metin unidade nasional iha pasadu, ohin loron no ba futuru nafatin kaer metin unidade nasional Timor-Leste entau joventude partidus politikus sira atu hanoin halo mudansa ne’ebe signifikadu ba ita nia rain,” dehan Ribeiro.
