Prezidenti Komisaun G nebe trata asuntu Infra-Estrutura, Deputadu Pedro Martires da Costa hateten estrada iha Subaun ki’ik no Subaun bo’ot nebe ke’e husik deit tanba estrada tama iha orsamentu imprestimu.
“Obra sira iha Subaun no Maubara neba ne’e antisipasaun Governu nian atu halo luan tuir padraun internasional nian,” hateten Prezidente Komisaun G, Deputadu da Costa, semana kotuk, (26/03) iha Uma Fukun, Dili.
Deputadu Martires afirma, estrada Subaun, Dili, Maubara to’o Mota-Ain sei hadia ho orsamentu imprestimu.
“Imprestimu ne’e mos iha ona, foin dadauk Primeiru Ministru ba Japaun, hetan ona e imprestimu faze pur faze ne’e atu minimu implementasaun husi Banku Dezenvolvimentu (ADB) atu hadia estrada sira ne’e,” Deputadu da Costa dehan.
Deputadu ne’e haktuir, projetu halo luan Estrada, tantu iha Subaun, Dili no Maubara uza orsamentu rasik, maibe atu hadia lolos ne’e ho orsamentu imprestimu. “ Orsamentu imprestimu sira ne’e agora iha prosesu tenderizasaun,” Deputadu da Costa tenik.
Deputadu da Costa hatutan, ho orsamentu imprestimu ne’e sei hadia total estrada sira tuir padraun internasional ho nia medida 6 metrus.
“Iha Planu Estratejiku Nasional ne’e dehan katak, komesa tinan 2012 ita hadia dadauk ona estrada tuir padraun Internasional,”deputadu da Costa tenik.
Entretantu Sekretariu Estadu Obras Publika, Domingos Caero hateten, estrada sira ne’e ke’e atu movimenta material eletrisidade, tanba material sira ne’e bo’ot kurva mate sira ne’e kareta labele liu entaun Governu liu husi sekretariu Estadu hola inisiativa ne’e.
“Agora ami hare, iha tempu udan iha Subaun ekipa ida mak iha neba, wainhira rai monu sira ba bo’ok,” dehan SE. Caero.
Tuir Sekretariiu Estadu Caero, seidauk bele tau alkatraun maibe importante mak movimentu transportes labele para.
“Em felismente ate agora ita seidauk iha afeta ida katak movimentu para total hanesan uluk Ponte Loes,” SE. Caero informa.
