Prezidenti Conselho Nasional Joventude Timor-Leste (CNJTL), Leovigildo da Costa Hornai hateten CNJTL nudar mahon ba joventude ho inisiativa atu harii forum komunikasaun ba lideransa joventude partidu politikus sira atu halibur joventude sira ho ativu hodi harii paz no estabilidade iha rai laran.
“Ami fiar metin katak ho lider partidus politikus sira ne’ebe iha bele koalia no informa ba malu diak liu tan ho militantes, apoiantes no joven sira seluk importante tebes forum ne’e estabelese hodi fo dedikasaun ba prezidente partidu sira atu halo diskusaun,” dehan Prezidente CNJTL Hornai, semana kotuk (22/03) bainhira hala’o lansamentu ba forum komunikasaun ba lideransa joventude partidu politiku, iha Farol, Dili.
Nia hatutan, CNJTL pronto atu fo apoiu ba desizaun hotu ne’ebe lideransa joventude partidus politikus sira halo no sei lahalo intervensaun ba programa tanba CNJTL entrega tomak poder ba lideransa joventude partido politikus sira atu dezenvolve planu no kalendario ba programa no aktividade.
Prezidente Hornai, afirma topiku importante ne’ebe forum sei halo iha futuru mak, lideransa sira sei koalia kona ba papel politiku nudar partidu politiku e mos kona ba papel siviku hanesan sidadaun ida no koalia kona ba social hola parte hanesan sosiedade ida.
Iha lidun seluk Prezidente Conselho Congresu, Ricardo Ribeiro hateten atu povu labele hetan tan trauma hanesan akontesementu iha krize 2006, joventude tenke hatudu imagen diak iha forum ida ne’e, liu-liu joventude partidus politikus sira atu hatudu ba militantes no simpatisantes sira .
“Hau husu para labele para iha nivel nasional deit bele abranja to’o iha suku no aldeia tanba problema sempre mosu husi kraik mak mai entau forum ne’e inportante tebes ba lideransa joventude partidu sira atu halo diskusaun konaba unidade nasional no problemas sira ne’e,” Ribeiro husu.
Nia hatutan, lideransa joventude hateke ba oin maibe hanoin mos istoria ba kotuk katak partidus sira ne’e mai husi hun ida deit hanesan bele hanoin ket-ketak maibe tenke iha hanoin ida deit mak unidade nasional.
“Nudar presidente joventude partido CNRT pronto fo apoiu ba ideias no desizaun ne’ebe iha, ami espera katak inisiativa ida ne’e labele to’o deit iha nivel nasional maibe forum ida ne’e atu halibur lideransa joven hamutuk hodi halo sosializasaun tu’un ba iha baze katak organizasaun joventude ida deit,” dehan Prezidente Joventude Partido CNRT, Jose Cristovão.
