Prezidente Republika Timor-leste Jose Ramos Horta, preokupa tebes ho kondisauan Polisia Nasional Timor-Leste (PNTL) nebe maka ladun favoravel, no husu ba governu atu toma atensaun ba sira nia situsaun ne’e.
“Bainhira hau hakat la’o iha rai ida ne’e nia laran, hau nia fuan triste teb-tebes wainhira hau hare kondisaun ita nia elementus polisia nia moris, hau hatete urjenti, ita hadia kondisaun iha sira nia servisu fatin, ba official no sarjenti sira,” hateten Xefe Estadu Horta, iha aniversariu loron PNTL ba-12 nian (27/03) iha Kaikoli, Dili.
Tuir Xefe Estadu Horta, iha buat barak mak sei menus iha Institusaun PNTL, liu-liu iha polisia sira iha Distritu no prresiza hadia, nune’e sira bele hala’o sira nia knar ho diak.
“Sei falta mos investimentu diak ba instalasoens infrastutura, kondisaun servisu nian liu-liu iha Distritu no Sub-distritu, pur ezemplu kondisaun servisu Batalion Ordem Publika (BOP) nian iha Baucau ne’e halo ita nudar nasaun, nudar estadu laran susar tanba la identifika institusaun PNTL, fardamentu ita hare, ita la halo esforsu para sira mos iha farda nebe sufsienti atu bele hatais ho profesionalismu ho dignidade,” dehan Prezidente Horta.
Hatan ba kestaun ne’e II Komandante Jeral PNTL, Superintendente Afonso de Jesus katak, preokupasaun Prezidente hanesan mos buat nebe maka sira sente durante ne’e, maibe ne’e kompetensia Governu nian atu hare ba kondiasaun hirak ne’e.
“Preokupasaun Prezidente hanesan mos preokupasaun ami nian, ami preokupa teb-tebes. Ita bo’ot sira hatene katak ami mai ona ho idade 12, maibe ami nia kondisaun balu ke seidauk favoravel ba ami para ami halo ami nia servisu ka ami nia knar, prezidente kolia ne’e hanesan fo hanoin bebeik ba governu sira, karik governu foun ka governu nebe maka aban bainrua kaer, tenki tau duni atensaun ba kondisaun PNTL nian,” dehan II Komandante de Jesus.
Kompara ho nasaun seluk ne’ebe iha fasilidade kompletu no mesak diak hotu, maibe kompriende tanba TL nudar nasaun foun no sei iha dezafiu barak.
“Hau mos kompriende katak ita nia situasaun nasaun ne’e nudar nasaun foun, foin maka hala’o tanba ne’e maka iha fatin seluk ami ejiji ba iha governu para atu tau atensaun maibe sei iha prosesu nia laran, ne’e duni hau hanoin neneik-neneik sei hetan hotu kondisaun nebe mak diak,” II Komandante de Jesus esperansa.
