Segundu Komandante Jeral Polisia Nasional Timor-Leste (PNTL), Superintendente Afonso de Jesus hateten, polisia iha ona Livrus Mutin (mata dalan) no durante ne’e sira hala’o knar bazea ba saida mak hakerek ona iha livrus ne’e.
“PNTL iha kaderneta ki’ik oan ida nebe maka kria, para idak-idak lori, mos buat balu nebe mak ligasaun ho PNTL nia regulamentu liu-liu iha parte disiplinar ninian ne’e ami iha,” dehan Segundu Komandante de Jesus, iha nia knar fatin, semana kotuk (29-03), iha Kaikoli, Dili.
Tuir II Komandante de Jesus katak, Livrus Mutin ne’e mak hanesan mata dalan ba membru polisia sira, atu hala’o sira nia servisu iha baze nudar servidor ba povu no ba nasaun laran.
II Komandante hato’o kestaun ne’e relasiona ho ejizensia husi Fundasaun Mahein (FM) nian, atu Instituisaun PNTL kria Livrus Mutin ka Buku Putih, nune’e sira bele hala’o knar tuir saida mak hakerek iha livrus ne’e.
Entretantu tuir Peskizador FM, Joao Almeida katak bazea ba livrus mutin ne’e mak membru polisia sir abele hala’o sira nia servisu ho diak.
“Planu ida nebe orienta PNTL atu ba nebe no hanesan mata dalan ida ba institusaun PNTL para bele la’o tuir, tenke iha buku putih ida,” dehan Peskizador Almeida.
Tuir nia wainhira kuandu iha ona livrus mutin iha Institusaun PNTL nia laran, komesa hatene ona dezenvolvementu husi PNTL ne’e rasik.
“Ita nia institusaun PNTL mos presiza halo estudu ida, para estudu ne’e hanesan mata dalan ida ba sira, para ita bele hatene katak, sira iha tinan rua nulu, tinan sanulu, tinan tolu tulu mai ne’e ita nia modelu dezenvolvementu ba institusaun PNTL ne’e ita hatene ona,” dehan Peskizador Almeida.
